Aizawl: Mizoram pumah sorkar tanpuinaa thelret (rubber) ching chhungkaw 2,927 an awm a, department tanpuina tel loa ching hi an awm nual bawk.
Rubber Development Board hotuten an sawi danin Mizorama thelrette hi a hnai a tha hle a, chhungkaw tam takin an huana an chin thelrette hi hnai theih a ni tawh hlawm a, hemi avang hian Mizoram sorkarin thelret herna khawl 100 lo neitute hnenah a sem chhuak tawh.
Mizoram chhungah thelret ching uar zual khua chu Zawlnuam niin, kuminah chhungkaw 50-in an huana thelrette chu an hnai tawh a, tunah hian Zawlnuamah thelret kg khat Rs 145-in hralh a ni a, a market-ah hian harsatna a awm lo a; sorkar inrawlh pawh a ngai lo a ni.
Rubber Development Board hian NABARD atangin kumin Rubber Smoked House 50 sakna tur pawisa an dawng leh dawn a, nakumah chuan chhungkaw eng emaw zatin an hnai theih ngei an beisei.
Nimin khan Land Resources, Soil & Water Conservation enkawltu, Minister R Lalzirliana chuan Rubber Board of India hnuaia Rubber Development Board Office thar a hawng a. |helret chin chu Mizoram economy siam tha thei nia a hriat thu sawiin, department-in rubber chingtute puih nan theihtawp a chhuah mek tih a sawi.
R Lalzirliana chuan sorkar a inthlakin, sorkar hmasain a lo kalpui tawh leh a tuipuite sorkar mekten an hluihlawn hian a tuar nasa ber chu kuthnathawktute an ni thin tih a sawi a; chuvangin, kuthnathawktute tana hmalakna tha leh an hlawkpui thei chi thilte chu kalpui zel tha a tih a sawi bawk.