Bahujan Samaj Party, Uttarakhand Kranti Dal leh Aam Aadmi Party ten nakum kum tira Uttarakhand assembly inthlan lo awm turah bial awm zawng zawngah an chuh vek dawn tih an puan hnuah Samajwadi Party pawhin bial 70 an chuh ve vek dawn tih an puang veleh.
Party hian an worker leh district unit office bearer-te atangin bial tina chuh tur âwm mi leh a phute an thlang dawn.
Uttarakhand state in-charge leh party thupuangtu, Rajendra Chaudhary chuan tlangram state-a mipuiten rintlak, tlo leh hmasawnna keng tel politics kengtu, SP chu duhthlan tur an nei dawn tih a sawi.
SP hian Uttarakhand-ah hian an party worker, booth management, membership drive bakah district khawpui, khua, block leh veng bil-a insawhnghehna tur lam an buaipui nasa hle.
Kumaon leh Garhwal division-ah SP hian convention huaihawtin inthlan lo tura kal dan turte chu hruaitu lawkte nen an sawiho dawn.
Sorkar laipui leh state-a BJP kaihhruai sorkarin mipui mamawh an phuhruk lohzia sawiin, Chaudhary chuan, “Khawl pahnih hmang chungin BJP hian mipuite dik lovah an hruai a, tlangram state-ah hian hmasawnna lam hawipui aiin kum nga daih sorkar an tum a ni,” a ti.
“Kum li leh a chanve chhunga chief minister vawi thum an thlak bak Uttarakhand-ah hian BJP hian eng nge an tih? Mahakumbh-ah inendikna lem, party chhungah induhsakna, cabinet minister leh MLA zingah inthliarna, ei rukna leh inthlan dawna intiamna lian tak siam an ti bawk,” tiin a sawi.