Tun thla a professional boxing inelna huaihawt tur LPS Fight Night 2 khuhhawnna chu nimin khan Sports Minister Robert Romawia Royte chuan a hmang a. He Fight Night-ah hian IBA Intercontinental champion ni lai NT Lalbiakkima a inlan dawn.
November 27-ah Dawrpui Multipurpose Centre-ah LPS Fight Night 2 hi buatsaih a ni dawn a. Champion lai NT Lalbiakkima’n Thai boxer Gerrtipong Kumsahwat hmachhawnin title humhim a tum dawn a, round 10 inhnek tura tih an ni. Mizo boxer dang parukin Mizoram pawna Indian boxer an bitum bawk ang.
Sports minister chuan, “”IBA title hi Mizoramin hloh lo ila ka duh hle a, sorkar pawhin kan duh. Biakkima ka ring tawk a, mahse, game a nih miau avangin hlauhthawnawm ve thei.”
“Mizo boxer dangte hnenah pawh duhsakna ka hlan a, sorkarin kan thlawp a, kan tih theihah theihtawp kan chhuah zel dawn. LPS Fight Night en turin Zoram chhung leh khawvel puma Mizo zawng zawng ka sawm a, hnam dang kan thiante pawhin en ngei se ka duh a ni.” a ti.
Engtin zel
LPS Vision-in LPS Fight Night 2 senso zawng zawng a tum dawn a. Thailand atangin Kumsahwat leh a coach an lo kal dawn a, Mizoram pawn India ram hmun hrang hrang atangin boxer leh mi pawimawh mi 20 chuang Aizawlah an lo kal tura beisei a ni bawk. An kalna leh hawna, Mizorama an cham chhunga an thlenna senso, an hlawh zawng zawng nen tumsak vek an ni ang.
Changtlung leh hmuhnawm thei ang ber tura cheibawl a ni dawn a, Covid-19 leng avangin mipui nawlpui hnenah inhnek enna ticket hralh chhuah a ni dawn lo. A hmuna lut thei tur bithliah chin siam fel a ni ang a, LPS Fight Night 2 hi television kal tlangin zau zawka pek chhuah zui zel tum a ni.
Boxer-te hamthatna
LPS Boxing Promotions chuan Kumsahwat-a hlawh atan dollar 1,500 a pe dawn a, hetiang zat chiah hi champion lai NT Lalbiakkima’n a hlawh ang.
Mizo boxer pasarihin an inhnek atanga hlawh an neih theuh dawn bakah par-per-view (PPV) atangin chanvo an nei tel dawn a, PPV hralh chhuah tam dan azirin an sum lak luh a tam mai dawn a ni.
Pay-per-view
PPV chi hrang pahnih atangin LPS Fight Night hi pek chhuah a ni dawn a, hemi atang lo chuan live-a en theih a ni lo ang.
LPS Vision pawttute hnenah Cable PPV Home unit khat Rs 60-a hralh chhuah tur a ni. Hei hi senso hmuh letna tura ruahman a ni a, Organising Committee-ah lut vekin heta tang hian LPS Fight Night hi buatsaih a ni ang a, sponsor leh PPV-in senso a daih lo a nih chuan LPS in a tum vek ang.
Khawvel huapin, a duh apiang en theih turin Chhambal Application PPV hmanga pek chhuah a ni dawn a, unit khat Rs 100+ tax a hralh tur a ni ang. Heta tanga sum hmuh 85% hi Mizo boxer pasarihin an insem ang a, a bak 15% chu Chhimbal Application-in an chang ang.
LPS FIGHT NIGHT 2 – Fight card
Main Event – Minimum weight
IBA Intercontinental Championship
Nutlai Lalbiakkima (India) – 2 win, 0 loss, 0 draw
Gerttipong Kumsahwat (Thailand) – 6 win, 9 loss, 0 draw
Undercard
Featherweight
Laldingliana (Mizoram) – 1 win, 0 loss, 0 draw
Rohit Mehra (Haryana) – 2 win, 1 loss, 0 draw
Super Lightweight
Vanlalawmpuia (Mizoram) – 2 win, 0 loss, 1 draw
Suresh Pasham (Hyderabad) – 2 win, 1 loss, 0 draw
Super Bantamweight
F Zoramchhana (Mizoram) – 2 win, 0 loss, 0 draw
Sandeep Singh Bhatti (Punjab) – 4 win, 2 loss, 0 draw
Super Welterweight
C Lalhruaitluanga (Mizoram) – 1 win, 0 loss, 0 draw
Kamal Kant (Rajasthan) – 4 win, 0 loss, 1 draw
Lightweight
HC Lalramfela (Mizoram) – 1 win, 0 loss, 0 draw
Parash Chauhan (Gujarat) – 0 win, 0 loss, 1 draw
Super Middleweight
H Lalrinhlua (Mizoram) – debut
Subin Augustine (Hyderabad) – 1 win, 0 loss, 0 draw