- Mahmuaka Chhakchhuak
November thla chuankai tawhah hi chuan a boruak alo vawt lam tawhin kawrlum hak pawh kan uar tan chho bawk a, kum upa lam atanga naupang lam thleng pawhin kawr pan lam chu kan ha tawh meuh thin lo. Thawmhnaw lum lam dahkhawmna bawm pawh kan hai let tan tawhin mutnaah ngei pawh puan kan sin thuah a nih loh pawhin puan chhah lam kan sin tan tawh bawk a. Chutih laiin tupawh mai hi kan harhvang theuh tawh mai bawkin ngurchuai hmel kan paih tawh a, atu pawh mai hian hlim hmel ka pu ta vek mai em ni tih tura kan hmel hmuh lo nuam ta hi Thlasik rim ti namtu ber chu a ni mai awm e. Thlasik rim kan tih avanga hnara hriat chi a ni hauhin a hriat loh a, pangpar anga hnim chi lah niin a hriat hek loh. Chuti chung chuan kan sawi fo a, kan sawi ri reng a, vawiin thlengin kan la sawi cheu a nih si hi.
He thlasik rim rawn nam chho tanah hian nangmahah engtinnge a thawh ve ka hre hauh lo nain keimahah chuan khawharna hi a mal nilo, a rual hian a rawn thawk thin thung a. A tir lamah chuan min rawn hnim de de a, a hnuah min rawn hnaih hriau hriauin min rawn pawm bet a, min zuam a, min ngam tak riau chinah phei chuan min buanthlu ta hial mai a, ka chakna leh theihna hmanga han beihlet ngial ka tum pawh chuan ka ke a pheh tlat si avangin beilet turin chakna reng ka lo nei tawh thin silo. Hmeichhe buan chak lo an sawi ang maiin ka awn ruai ruai mai a, min bawhbet leh nge nge thin. A mak ngawt a sin, he thlasik huna khawharna rawn thleng thin hi hriattir lawkna engmah awm si lo hian a rawn thleng phut mai a, chhun khaw en laia mi kawngkal hmuh mai mai te, tlai lama naupang infiam lai hmuh leh zan reh te ngei pawh hi an hmanrua atan an hmang vek mai si a. A chang hi chuan a rehtheihthlak viau thin a, a chang leh a hlimawm chang a awm bawk a, a chang phei chuan mittui ti tlatu mai a ni bawk a.
Hnam dang leh ze hran neite hian he thlasik hi engtinnge an hman thin ka hre hauh lo nain keini mizote tan hi chuan thlasik hian awmzia a nei bik riauin a hriat a. A bik takin lunglengmi tan ngat phei chuan a awmzia hi sawifiah thiam rual a ni lo hial awm e. Thlungah a vit a, nak nemah na takin a khawih bawk a, ka lamah engmah a lut thei lo bawkin leh kaihza tha a chhah bawk avangin patling pui tawh pawhin khumah an let tawp tawh maiin a rum ngawl ngawl tawh mai thin a, a mi khawih hi na tak a ni ringawt mai. Nupui neiin kawppuite han nei reng mah ila anni aia thuk leh lian zawkin min delh beh miau si avangin anni chu an pawimawh lo e tihna ni chuang hauh loin kan kianga an awm lai ngei pawh hian kan thinlung chu Mel sang tam danah a awm daih a, kan kawppuite chuan an hriatthiam ve si loh chuan inhauh bul tannate emaw alo nih phah bawk a, an hriatthiam thung erawh chuan min duatin Artuite min chhum hial phah thin bawk a.
Hla phuah mi ka ni hauh lo nain hla phuah mite ngei pawh hi he Thlasik boruakah hi chuan an awm mai mai hauhin a rinawm loh a, zan mut theih loh chang hi an ngah ve thinin a rinawm. Keini mai mai tan pawh heti taka a mi deh a nat chuan anni tan chuan a na ngei ngei ang tih a rin theih mai a, biak huphurhawm khawpa men pual chang hi an ngahte hian kei ka ring hial thin. Chutiangin mittui nen hun lo hmang ta fo pawh nisela kei chuan ka dem hauh lo a, he thlasik hian an thinlung lo ti no deuh ta pawh niin lo tap bawrh bawrh mahsela ka dem hauh chuang lo. Thinlung ipikna zawng zawng bun ruak vek khawpa tah hawm hawm nawm zia te pawh ka lo hriat ve deuh ruak ruak tawh avangin a manhla hian ka hria a, patlingte pawh khawilai hmunah emaw lo inhnit deuh feih feih mahsela ka hriatthiampui thei hial tho awm e.
Lusunte tan ngat phei chuan hetianga Thlasik hun hi a hrehawm thinin a rinawm a, tlai lam ni tlak hnu leh zan thim rawn thlen hma sia puan lukhuha thlana lo tah kerh kerh hi a awl thin viau awm e. Zan boruak vawtin min rawn tih harh changa mut leh mai theih tawh silohahte pawh hian kaltate hi ngaih an na duh viau thin a, mahnia suangtuahna rama chen a, a lungchhe zawnga thinlung lo neih mai hi awl tak tur niin a hriat. Ngaihzawng then avanga kohhranhote tawngtaipui ngai khawpa damloh phah tawhte ngat phei chuan na tak tur hi a ni a, chutiang pawh ni kher lo tan pawh lusunna hi chu indem ngawt chi a ni hauh chuang lo ang. Hun leh ni hian a tidanglam lo a, khuarei hian a hnem tak tak thei chuang hek lo. Kum sawm tam liam tawh amite ngei pawh nimin emaw leka thleng ang maiin thinlungah ala fiah uar uar thin si a, chutiang tak mai chu hetiang Thlasik boruakah phei hi chuan alo zual a nih pawhin inhriatthiam tlan zel hi alo tha ngei ang.
Thenkhatte lah chuan sumdawnna lamah an buai em em a, zan mut hun pawh nei thei meuh loin zankhaw tairek thleng thlengin an buai a, an demawm hauh chuang loh nain a lehlamah chuan an awh-awm thin hi ka ti a. A chhan pawh Thlasik boruakin anmahni danglamna engmah a thlen ve lo em ni tih tur hi an niin Thlasik rim ngei pawh hi an hriat hman a rinawm loh hial zawk si a. Engpawhnisela, hetianga thlasik rim a rawn nam tawh hi chuan khel loin khawharna hian a siruk laa min rawn buan tawh thin bawk si avangin awm mai mai a theih tawh ngai loh a, thosilen hnuaiah pen leh lehkhapuan nen bati eng rinchhanin kan thiam ang anga lunglen thu ziah leh mai thin hi min rawn chawh tlat pek thin si a. Thlasik rim a rawn nam tawh dek dek hi chuan khawharna hi a rawn thleng chawpchilh ve mai thin bawk si a.
Aw……engtikah tak lunglen thu hi ziak zo tak ang imaw le?