Aizawl Auperintendent of Police (SP) C Lalruaia chuan sorkarin Krismas leh kumthar vuakveta halpuah leh a kaihhnawih a khap chu khauh taka kenkawh an tum thu a sawi a, nikum khan he khapna thupek bawhchhia mi 28 chu thubuai siamsak an nih thu a sawi.
Nimina a pisaa chanchinbumite a kawmnaah C Lalruaia chuan Aizawl District Magistrate-in October 13-a halpuah leh kaihhnawih zawrh leh hman khapna thupek a chhuah hnuah Aizawl SP hnuaia special cell-ten hma an lak nghal thu sawiin, “Dawr leh godown-te pawh kan endik reng a, tun thlengin thubuai pakhat chiah kan la nei,” a ti.
Aizawl SP chuan sumdawng leh online-a bungraw chah luttu agent-te pawh heng khap thilte chah lut lo turin an ngen tih a sawi a, Flipkart leh Amazon pawh hmunpui lamah email hmangin heng thilte rawn thawn lut lo turin ngen an ni tih a sawi.
Halpuah leh a kaihhnawih khapna thupek tihchhuah a nih hnuah Aizawl chhunga armed force awm – Assam Rifles, CRPF, BSF, Field Ambulance, BRTF leh hnam dangte chu sorkar thupek ngai pawimawh leh an hmuh theuha kengkawh turin an ngen tih sawiin, “Diwali hunah pawh halpuah leh halmawi hal ri hriat tur leh hmuh tur a awm lo a, hmun thenkhata halpuah puak zauh awm pawh kan bawhzui nghal a, an hotute pawhin thahnemngai takin heng pawh hi an um zui ve nghal,” a ti.
C Lalruaia chuan Aizawla hnam dang awmten an sakhaw kut nena inzawm tlat ni mah se sorkar thupek an zawm tha tih sawiin, “An kût nena inzawm tlat halpuah leh halmawi hi hnam dangte pawhin an kalsan theih chuan Mizote pawhin kan kalsan ve thei,” a ti a, mi tinte sorkar thupek zawm tha turin a sawm.
Nikum Krismas leh kumthar vuak vetah khan halpuah leh halmawi kaihhnawihah Aizawl district chhungah thubuai 22 ziah luh a nih thu sawiin, hetah hian mihring 28 thubuai siamsak an ni a, thubuai pasarihah hremna tihchhuah tawh a ni tih leh thubuai 15 chu court a la ngaihtuah lai a nih thu a sawi bawk.