- Er. Chhungpuia Renthlei
He tawngkam hi kan hriat zin pawl tak a ni ngei ang. Enge maw tih tur han sawi dek dek ila, Ka buai lutuk, hun ka nei lo tih hi kan hre leh thin.Tu te pawh hian kan tana tangkai, pawimawh leh tha tur ni a kan ngaih atan te leh kan duh zawng tih atan chuan hun kan pe thei vek mai.Indaih lo hle mahila kan nuam tih zawng,hmingthatna leh ngaih pawimawh tak mite tan chuan hun tlem tal kan pe thei thin.
Kan tangkaipui tur lemloh a kan ngaih te tan erawh chuan hun awl nei mahila, hun nei theih loh hram dan kan ngaihtuah a, chhuanlam kan siam a, hun kan pe theilo thin. Indaih loh lai tak tak chu a awm teh meuh mahse, Ka buai lutuk, hun ka nei lo tih nazawng hi chu a nihna tak zawk ah chuan kan ngai pawimawh tawk loh vang leh kan hun kan pek phal loh vang a ni fo zawk thin. Kan ngaih pawimawh tak tak thilah chuan kan program duan lawk sa pawh kan tidanglam fo thin zawk.
Tu te pawh hian program hma chhawp kan nei vek thin. Kan hun awl hnawhkhah nan chauh a midang tanpui kan tum hi a fuh chiah lo. Kan buai lai tak te hi miten min mamawh hunlai a lo ni ve fo thin. Kan hun neih te hi kan nuam tih zawng leh kan hamthatna tur ringawt atana hmang vek lovin, a tul hunah chuan kan nuam tih loh zawng leh kan chawi belh zawk hialna tur pawh ni se midang te tana malsawmna ni tura hun kan pek a tul thin.
Hming that theihna khawtlang leh kohhran thila hun nei tak, mimal tanpui ngai ngawih ngawih te tan erawh hun nei thei reng renglo te leh khawtlang leh kohhran hnatlan huna chhuanlam siam reng thin te pawh kan awm thei awm e. Mahni hmasawnna tur thil tih nana hun in pe a taima taka hnathawk thin te hi “Mahni tan chakai an khawrh” a ni. Midang emaw khawtlang ten min mamawh viau laia mahni tan chauh a hun inpe phal te rawh chu “Mahni hmasial” a ni leh thung si. Anihna takah chuan mi dang tana Ka buai lutuk, hun ka nei lo ti fo thin te hi chu mahni hmasial takin mahni tan chakai an khawrh a ni ber mai.
Sapin “A sat laiin chhu rawh” an tih leh kan pipu ten “Sem sem dam dam ei bil thi thi” an tih hi kan hun neih sem zai thiam nan a pawimawh khawp mai. Nitina kan hun neih te hi keimahni tan leh midang tana tangkai thei ang bera hmang tura sem zai thiam hi a tul thin. Khawtlang leh mimal tana a tul huna hun pe thin te hi mi tlawmngai, bengvar leh taima an ni fo.
Mihring hi in mamawh tawn vek kan ni a, a bikin kan chenpui, unau leh chhungkhat te, thian te leh nitin eizawnna a kan thawhpui te hi kan in mamawh hun a awm thin. Bible ah I sumin Lalpa chawimawi rawh tih a ni a, Mithiam ten Hun hi pawisa a ni an ti leh a. A hun taka midang te tanpui hi Pathian kan chawimawi ve theihna awlsam ber a ni. Eng mi pawh ni ila, kan phur zawng leh ngaih pawimawh aia atulna avang zawka mahni chauh in ngaihtuah lova chhungkua leh khawtlang tana hun semzai thiam hi Pathian duh zawng pawh a ni ngei ang.