Germany in coach Hansi Flick hnuaia vung tak maia an kallai chu an chhunzawm zel a. Covid 19 avangin an team chhungah harsatna awm mahse Liechtenstein lakah harsatna neih phah miah lovin 9-0 in an hneh.
Volkswagen Arena a World Cup qualifier khelh a nih hma hian Germany in an defender Niklas Sule chu Covid a kai tih hmuhchhuah a ni a. Player panga inkhel thei lova awmin Flick-a’n a team a thlak danglam a, Jonas Hofmann, Thilo Kehrer, Christian Gunter leh Ridle Baku te bul tantu zingah a telh.
Germany tan hian Thomas Muller leh Leroy Sane ten goal hnih ve ve an khung a. Tling chiang tawh sa an ni chungin tha thlak lova khelin an chungnung chiang a. Inkhel hun tam zawk chhung player tam zawk an nih avangin an tan thil a awlsam leh zual.
A goal mawlh mawlh
Liechtenstein hi minute 9-naah red card avangin an khingbai nghal a. Jens Hofer chuan Leon Goretzka a tlawh luih avangin hnawhchhuah a ni a. Hlauhawm taka a chet avangin penalty a chawi bawk a, Manchester City midfielder Ilkay Gundogan chuan penalty a pet goal.
Minute 20 an khelh thlenin minute thum chhungin goal thum an khung belh a. Daniel Kaufmann chuan an lamah Germany goal hnihna a ti lut a. Leroy Sane leh Marco Reus ten 22-na leh 23-naah an khung belh thuai.
An coach hlui Joachim Low thlah a nih zanah Germany hian second half tan atanga minute li chhunga goal khung lehnghal in Sane bawkin goal a khung a. Thomas Muller-a’n minute 76-naah goal khungin minute 80-naah Baku-a’n a chuhnzawm a. Minute 86-naah Muller bawkin khung lehin huntawp hma in Max Goppel own goal an nei leh bawk.
An group atanga tling chiang tawh Germany hian Armenia karlehah an hmachhawn leh ang.
Goal khungtu Muller chuan, “Inkhel entu an awm a, boruak a nuam zual. Goal khung belh zel kan tum a, fans te pawhin nuam an ti a. Keini lam pawhin duhtawk mai kha kan tum lo.”
“Inkhel tan tir atanga an tlem zawk nghal khan inkhel a ti awlsam a, chance kan ngah phah ngei. Mahse a pumpui a thlirin kan group-ah hian kan tana khingpui han harsa lutuk tur an awm lem lo hrim hrim.” tiin group stage an chetthat chhan a sawi.
Record siamtu pahnih tan inkhel pawimawh
Group H atanga World Cup khel tura tling chiang tur zawnna naktuk zanah khelh a ni dawn a. Croatia in Russia mikhualin an pahnih atang pakhat an tling ang.
Ningani zanah ram pahnihte hian inkhel an hmachhawn ve ve a, an ram chanchin a hnehna an chan chian ber tum hmang ve ve in Croatia in Malta 7-1 in an hneh a. Russia in second half-ah goal nga khungin Cyprus chu 6-0 in an hneh.
Group H hmahruaitu Russia in Saint Petersburg Stadium-ah Cyprus an mikhual a. Aleksandr Erokhin chuan minute 4-naah goal a khung a. Second half-ah pawh khung lehin Fedor Smolov, Andrey Mostovoy, Aleksei Sutormin leh Anton Zabolotny ten khung bawkin Croatia lakah hian point hnihin an sang zawk mek.
Ta’ Qali National Stadium-ah Croatia an kal ve thung a, Lovro Majer chuan goal hnih khungin Ivan Perisic, Duje Caleta-Car, Mario Pasalic, Luka Modric leh Andrej Kramaric ten goal khat theuh an khung ve thung.
An group a pathumna Slovakia aia point 9 a sang zawk Croatia hi playoff khel turin an tling chiang tawh a. Russia nen an inkhelh hunah chak zo lo pawh nise World Cup khelh beiseina an la nei.
Inkhel dang
Group A-ah Republic of Ireland in Portugal an mikhual a, Dublin a inkhelah hian huntawp dawnah Portugal defender Pepe chuan yellow card a hmu nawn a. Tlarhmaah Cristiano Ronaldo chu uluk taka ven ni bawkin goal inpe lovin an inhnehtawk.
Ireland in Matt Doherty goal pawm loh an nei a, Chiedozie Ogbene leh Enda Stevens ten goal an khung teuh bawk.