Mamit District Village Council Association (MDVCA) chuan tun hnaia Mamit district chhung, a bikin Hachhek tlangdunga kuhva huan siamtuten Assam lama an kuhva tharte hralhna kawnga harsatna an tawh chungchangah nimin khan Chief Minister Zoramthanga an kawm a, harsatna an tawh mek sutkianpui turin an ngen.
Chief Minister Zoramthanga hnenah MDVCA hruaitute hian Mamit district chhunga kuhva chingtuten Assam atanga kuhva rah leituten kuminah an lei that loh avangin leh rate hniam zawka leisak an tum avangin harsatna an tawh nasat dan te, kuhva rah hralh kawnga harsatna sawi hrang hrang awm zingah Assam lamin Burma ram atanga kuhva rah phur tela an puh thin avanga chhiah tam tak an laksak thin te, Assam lamin Mizoram atanga kuhva phur lut turte hnenah pawisa tam tak an chawitir avanga Assam atanga kuhva rah lei turten an lei that duh loh avang leh tlawm tak taka lei an tum avanga kum dang aia nasa taka a man an hloh avanga harsatna an tawh mek chu rang taka hma laksak turin an ngen a ni.
Mizoram atanga Assam lama kuhva rah hralh chungchanga harsatna a awm chu pawi a tih thu sawiin, chief minister chuan chak taka hmalak a tum thu lo hrilhin, khawthlang lamah kuhva rah tihrona khawl leh kuhva scope siam a nih theih nan hmalak a tum thu leh a theih ang anga ruahmanna siamho a nih theih nan hmalakpui turin MDVCA hruaitute a sawm a ni.
MDVCA President Lalropuia sawi danin, tun lai hian Burma kuhva khawthlang lamah phurh luh zeuh zeuh a awm thin a. Heng kuhvate hi Assam Medeli lamah phurh luh thin avang hian Mizoram kuhva rate a hniam phah bakah Assam lama hralhnaah pawh harsatna a awm nia hriat a ni. Burma kuhva hi khawthlang lam atanga Assam luhpui a nih avangin Hachhek huam chhunga kuhva chingtute chu Zamuangah darkar 24 an duty thin a; tun hnaiah Tuidam atanga Tumpanglui lamah phurh luh nia hriat a nih avangin Tuidamah pawh duty insiamin an awm leh a ni. Chumi hnuah pawh W. Phaileng atangin Tuilut lamah Burma kuhva hi kalpui leh an tum nia hriat a ni bawk.
Lalropuia hian kuthnathawktuten an thawhrim rah chu an phu ang tawk hlawkna an hmuh theih nan a tul ang zela hmalakpui zel an tum thu a sawi.
MDVCA hruaitute hian chief minister hnenah hian Mamit Town (NBCC) Road siamna ngaihtuahsak tur te, NH44 A (Mamit – Dapchhuah) tun thal laia siam tha tur te leh KDZKT road la siam zawh loh rang taka siam zawh a nih theih nan hmalaksak turin an thlen bawk a ni.