Joint action committee on inner line reserved forest demand (JAC on ILRFD)-in Inner line reserved forest 509 sqrs miles chhunga ramria hmalakna hrang hrang te tihtawp tha an tih loh thu an sawi a. Buaina chawkchhuaktu mai a ni dawn nia sawiin, a rangthei ang bera he thu pek hi sut leh turin ministry of home affairs leh Mizoram sorkar an ngen.
Ramria hmalakna titawp tura thupek avanga Mizoram sorkar leh mimal anga Mizoram chhunga hmalaknate tihtawp vek a ni chu pawi an tih thu JAC on ILRFD chuan an sawi a. Ramria hmalakna titawp tura thupek chu rang taka sut a nih loh chuan na taka an dodal tur thu leh thupek sut a nih theihna tura a tul ang apianga hma an lak tur thu an sawi.
“Chief secretary atana Mizo pa dah lova an thu anga awm thei tur an rawn dahna thalo tak chu a lang tan a, Mizo ngei thatna a lang chiang niin kan hria” JAC on ILRFD chuan an ti a. Mizoram leh Mizo mipuite zah der ve tura sorkar laipui pawh an ngen thu an sawi.
JAC on ILRFD chuan “Mizoram lamin status quo kan kalpui laiin Assam lam erawh chuan kalpui ve duh lovin, an duh thalin an che thin” an ti a. “Chief secretary thar kan neih veleha ramria hmalakna titawp tura hmalakna a awm nghal hi sorkar laipui leh Assam chief minister Himanta Biswa Sarma ten an duh ang taka chetlak an tumnaah kan ngai a, kan la thutak hle” an ti bawk.