Aizawl district bawrhsapin Biak Ina zai leh Krismas lawmna ruai theh chungchangah district chhunga kohhran pawl hrang hrangte ngaihdan L/VLTF kaltlangin a la khawm mek a, hetihlai hian Mizoram Kohhran Hruaitu Committee (MKHC)-in SOP-a ‘Pathian biak inkhawma zai phal loh’ tih tar lan chu telh tawh lo turin chief minister an ngen.
November 2, 2021 khan Aizawl District Addl Deputy Commissioner R Vanrengpuia chuan Aizawl district chhunga task force-te lehkha a thawn a, Biak Ina zai leh Krismas ruai theh tur chungchang chu kohhran hruaitute nen sawiho turin a hriattir a, hemi chungchanga rawtnate chu an hnena theh lut turin a ngen.
The Zozam Times zawhna chhangin Aizawl DC Dr Lalhriatzuali Ralte chuan Biak Ina zai leh hunpuia ruai theh chungchangah Kohhran ngaihdan an zawhna chu a luh khawm mek thu a sawi.
Hetihlai hian MKHC chuan hri leng laka himna tura sorkarin inkhuahkirhna thupek a siama ‘Pathian Biak Inkhawma zai phal loh’ tih leh ‘Sunday School-a class lak phal loh’ tih chu paih tur turin Chief Minister Zoramthanga an ngen.
The Zozam Times zawhna chhangin MKHC Secretary Rev R Lalrinsanga chuan November 2-a MKHC meeting thurel bawhzuiin November 3-ah chief minister chu a pisaah hmuin ngenna an thlen tih a sawi a, tuna sorkarin SOP a siam hi tha an tih rualin ‘Biak Inah zai phal loh’ tih leh ‘Sunday School class lak loh nise’ tia inziak chu telh tawh loh an duh tih chief minister hi an hrilh tih a sawi.
Rev R Lalrinsanga chuan inkaihhruaina thar siamah chuan ‘SOP zawm chungin inkhawm phal’ ti tawh mai turin chief minister hnenah hian an rawt tih a sawi a, “Hemi chungchangah hian tualchhung kohhrante ring ngam turin kan ngen a ni ber,” a ti.
MKHC secretary chuan kohhran tinten hri laka invenna kalpui dan chu an hrechiang thawkhat tawh tih sawiin, sorkarin zai phal pawh ti se mi tam tak hi an zai ngam chuangin a rinawm loh a, chutihrual erawh chuan tuna SOP-a an tar lan dan tawp hi chu a felhlel deuh an tih thu a sawi a; MKHC hian Biak Ina zai phal tawh chu an duh ber a; mahse, sorkar hi zai phal tawh tur tak erawh chuan an nawr lo a, tualchhung kohhran kuta dah turin an ngen tih a sawi bawk.