EDITORIAL 15/11/21


Kuhva buaina hi i ngaihven teh ang u

Khawvel hi ti nuama ti hahdam tura rorelna kan neih chu dan kan neihte hi an ni a. Chuvangin ram tinin dan leh dun hmanga rorelna ram, mipui tana tha tur an ngaihtuah a. Dan tha tak tak an siam thin. India ram pawh ram zalen leh nuam, hmasawn a lo nih theih nan dan siamtu (legislative) chu a chungnung bera thuneitu an ni. An dan siamte chu hnathawktuten an kengkawh (enforce) a. Mipuite chunga dik taka hman a nihna chuan ram nuam zawkah mi’n a siam a. Khawvela ram zalen berte zinga mi a lo ni ta a ni.
Khawvela ram dan zawm lova miin pawisa leh dik lo taka dan an palzutna ram chu ram nuam a ni ngai lova. Sumdawnna lamah thlengin dan a awm a. Chu chu ram mipuiin an zawm theih nan a kengkawhtuten hna an thawk reng thin.
Keini ramah pawh mi tupawhin dan hnuaiah sumdawnna an kalpui thei a. Fel taka an zawm tur dan siam chu zawmin ei an zawng theuh hlawm. Amaherawhchu tunhnaiah kan ram chhungah dan lova sumdawnna nasa tak – kuhva tawlhruk, tunah phei chuan tawlh lan a ni ta mah mah; a nasa em em a. Mi tam takin kan ram tichhe tur a nih thu an tlangau pui nasa tawh bawk. Sawi lawk ang ngeiin tunhnaiah phei chuan kan rama thlai thar kuhva a eizawngten an tuar ta. An kuhva chu dan dik lova kuhva sumdawnna kalpui avangin an hralh hlei thei lova. Kuhva thartuten motor veivak kuhva phurte an dang ta hial mai. Heng kuhva chingtute hian nakin zela an eizawnna a nghawng chhiat turzia an hmu phak a. An duh lo a ni. Dan lova sumdawnna a nih avangin chhiah an chawi lova, an kuhva man pawh a tlawm bawk. Chu chuan hah taka kuhva chingtute a luahlan a, lungawi lohna an lantir hi an tih makmawh a ni reng bawk.
He dan lova kuhva phurtute hi ram dan bawhchhia a sumdawng an nih avangin roreltu sorkar hian a enfiahin a control tur anih laiin an thlir liam mai mai a. Hei hian thinrim a innekna leh a aia pawi zawk tharum thawhna pawh a thlen thei tih kan sawrkar hian a hriat a hun ta hle. Chuti anih loh chuan buaina namen lo a inmung mek niin a lang.
Kan thenawm Assam pawh hian he kuhva tawlhna hi an buaipui nasa a. Anni lamah pawh hian hnawk an ti a. Mahse he sumdawnna lianah hian an ram hruaitute an inrawlh tlat a, politicianten chanvo an nei a. Chuvang chuan an ti tawp thei lova. Kan ramah hian tute chin hi nge inrawlh tih pawh hi chhui fe tham a nih hmel ta khawp mai.

Leave a Reply

Your email address will not be published. Required fields are marked *

error: Content is protected !!