Kuhva hralh harsatna: Minister Robert-a leh bialtu MLA-in kalchilh


Hachhek biala kuhva chingtuten an thar chhuah hralh kawnga harsatna an tawh chungchangah Minister of State Robert Romawia Royte leh Hachhel bialtu MLA Lalrindika Ralte ten Inrinni khan a hran ve vein an tlawh a. Kuhva chingtute harsatna sukiang turin hma an la.
Minister Robert Romawia hnenah hian kuhva chingtute chuan an kuhva thar, Assam lama hralhnaah Rangamati kawnga harsatna an tawh thin dante an lo hrilh a. Robert Romawia chuan Assam lama helai bialtu MLA Krishnendu Paul chu telephone-a be nghalin kuhva phurtuten a bial leh Assam chhunga harsatna an tawhte hrilhin titawp tura hma la turin a ngen.
Robert Romawia chuan Mizoram Chief Secretary Renu Sharma pawh Hachhek biala kuhva chingtute harsatna tawh chu hrilhin, a sutkian dan kawng zawnga Assam chief secretary pawh bepawp turin a ngen a ni.
Thudawnnain a sawi danin, Assam MLA Paul chuan Mizoram minister chu Mizorama kuhva chingtuten an kuhva thar hralhna kawnga harsatna an tawh titawp tura theihtawp a lo chhuah tur thuin a lo chhang a, Myanmar atanga dan lova kuhva lo lut dang tura tanho a tul thu lo hrilhin, remchang hmasaah inhmuhpuia a sawm a. Robert Romawia pawhin hei hi pawmin, Mizorama kuhva dinhmunte enchiang turin a sawm ve bawk.
Hachhek bialtu MLA Lalrindika Ralte pawhin Hachhek biala kuhva chingtute chu tlawh kualin, an harsatna tawh leh a sutkian dan turte a sawipui a. Assam lama biak tulte pawh a biak tur thu leh kuhva chingtute harsatna tawh chu sukiang tura theihtawp a chhuah tur thu a sawi niin thudawnna chuan a sawi.
Tar lan tawh thin angin Myanmar lam atanga Mizoram paltlanga dan lova lak luh kuhva a tam avangin Hachhek biala a chingtuten harsatna an tawk nasa a. Mizoram kuhva lei thin Assam lama miten Mizoram kuhva pawh Myanmar atanga lakluha ngaiin an lei duh loh phah a. Hachhek biala kuhva chingtute chu Myanmar lam atanga dan lova kuhva lo lutte dang turin tlaivarin an duty thin hial a ni.

Leave a Reply

Your email address will not be published. Required fields are marked *

error: Content is protected !!