Russia chuan a kut atanga India-in ralthuam a lei tur, S-400 Triumf surface-to-air missile system chu a leitute hnenah a thlen tan ta tih Federal Service for Military-Technical Cooperation (FSMTC) Director Dmitry Shugaev chuan a sawi.
Dubai Airshow neih hma lawkin Shugaev chuan, “S-400 air defence system chu India hnenah hlan tan a ni a, ruahman anga kalpui zel a ni ang,” tiin Sputnik hnenah a sawi.
S-400 Triumf air defence missile system hi India-in hmelma indo thlawhna leh hmun hla kap thei cruise missile laka invenhimna atan a hmang dawn a. Indian Air Force (IAF) hian Ladakh lama China nena an inep mek laiin hetiang hmanraw tha hi a nei thei dawn a ni.
China hian Tibet rama Ngari Gar Gunsa leh Nyingchi airbase S-400 squadron a dah sa reng tawh a, hei hi Ladakh leh Arunachal Pradesh lam ramri venhimna atana a tih a ni.
News agency ANI pawhin air defence system hian India a thleng tan mek tih hotu liante hnen atanga a dawn a tar lang bawk a. A hmasaaah khawthlang lam ramri, Pakistan leh China atanga thawm neih rengna lamah a dah hmasa ang.
S-400 air defence system hi India hian Rs. Vaibelchhe 35,000 vela a lei tur niin squadron nga a ni dawn a, boruak lam atanga beihna laka a inhumhimna tura a tih a ni.
Hmanraw tharte hi thlawhna leh lawng hmangin India-ah hian phurh luh mek a ni a. Squadron hmasa ber chu kumin kum tawpah hian thlen kim hman beisei a ni.
Air defence system tha a neih hnuah chuan India hian km 400 vela hla atang pawhin hmelma thlawhna leh cruise missile chu a lo do let thei tawh dawn a ni.
S-400 missile defence system an tih hi missile chi hrang palia thuam niin hmelma indo thlawhna, ballistic missile, Airborne Warning & Control System (AWACS) thlawhna te chu km 400, 250, 120 leh 40 thlengin a kap thei dawn a ni.
A hmang thei tur hian IAF chuan a officer-te chu inzirin Russia-ah a lo tir tawh niin thuneitu sangte chuan ANI an hrilh.
India leh Russia hian he ralthuam inleisak tur hian October, 2018 khan inremna an lo siam tawh a, kum nga chhunga inpe fel hman turin an inrem a ni.