- Mahmuaka Chhakchhuak
Vawiin tlai chu ka pu (ka nupuia nu nuta) nen thingpui senhang in pahin kan titi a, rambuai lai chanchin min hrilhin ngaihnawm ti takin ka ngaithla a.
Rambuai lai khan kum 17 rual vel mi a niin vawikhat chu Ambush naah a tel ve a. An khua hi Muallianpui niin Sangau khua atangin 18th Assam Riffle Post awpna hnuaiah an awm a, Ram a han buaiah khan MNF te chuan Muallianpui khaw kiang hnaih lawkah chuan Assam Riffle te chu Ambush an tum a, a hma deuh atangin ruahmanna an lo siam lawk vek tawh bawk a. Sangau atanga Muallianpui an rawn kalna tur kawngah chuan a remchang laiah hian Ambush position an lo siamin kawng chhak lamah chuan Trent khur 20 dawn lai hi an lo lai lawk a. Chutah chuan silai nen lo changin Vai sipai (Assam Riffle) te chu an lo chang ang a, an inring lo lai chu silaia lo kapin an silai leh hmanraw dangte chu an laksak mai bakah an kah hlum chiah lohte pawh chu man an lo tum a ni.
Muallianpui khuaah hian Pawi veng leh Hmar veng awmin Pawi veng lamte hi MNF tantute an ni a, Hmar veng lam hi chuan Mizo Union lam an tan deuh zawk mah a. Ram a han buai takah pawh chuan Hmar veng lam chuan Vai sipaite chu hmelma en pawhin an en vak lem lo ni awm tak a ni. Amaherawhchu mizo theuh an nihna kawngah erawh an tangrual tha em em thungin Zalenna sualtute chu an tanpui vek thoin ka pute ngei pawh chu MNF te chuan Vai sipai ho ambush-na hmun turah chuan kal ve turin an huikhawm a, anni tleirawl rual chu mi 16 lai an ni nghe nghe. Hetih hunlai hi July thla niin ruahtui pawh a tlak uar lai tak a niin an chetchhuah zanah pawh hian ruah a tla seng seng a, vawt an ti khawp lehnghal.
Anni tleirawl rual mi 16 laite chu MNF te hian khawmin Ambush naa tel turin an ti a, In pakhatah hian an awmkhawm tirin zan rei tawh lamah chuan an hruaichhuak ta a. Ramhnuai lamah kalin eng chhit ngam a ni bawk si lo a, anmahni hruaitute kawrah vuanin zawimuangin an kal a, ruah a sur bawk vang chuan kawng pawh a nalin an tlu fo nghe nghe a ni. Chuti chuan thim tham karah Trent laihna hmun chu an thlengin khur khatah puitling zawk (MNF) te chu pakhat te tea awmin anni tleirawlte pawh chu pakhat theuh an awmpui bawk a. Hemi hmuna an silai hman hi silai tha tak pawh a ni lem loin Rifle phei chu pahnih/ khat emaw chauh an keng awm e. A tam ber chuan Awllan leh Tukuli an keng a, chu bak chu hmanraw dang an keng lo ni awm tak a ni.
Zing dar thum velah chuan Vai sipaite chu an rawn inzui ta dam dam a, an lo channa zawn an thleng chuan MNF te chuan an lo kap a. A thente chuan an silai chu an kap puak thei lo bawk a, reivaklo chhung chu buai takin an awm a. Ka pu phei chu ala naupan deuh avangin trent khurah hian alo muthlu hman hial a, silai puakah chuan alo harhin ngawi reng chuan an thawm alo ngaithla ve a. Hmanrua engmah an keng bawk chuang si lo a, tha thawh ngaihna reng an hre lo a ni. A hnua a sawi leh dan chuan hemi tumah hian kan tih tur engmah min hrilh lo nain kan rin dan chuan vai sipaite chu an kah hlum vek ang a, hnehna an chang a nih chuan an silai leh hmanraw neih ang angte chu keng khawm turin min duh a niin ka ring a ti a.
Nimahsela an beisei leh tum angin an hlawhtling ta lo a, thi leh hliam an awm lo nain vai sipai hi pakhat chu an kap fuh a. Vai sipaite chuan silai an neih that zawk avangin leh an tam zawk bawk avang chuan MNF lamte chuan in withdraw mai loh chuan ruangchaicheh rawn thlak thei dinhmuna ding niin an hria a. Thim tham hnuaiah chuan an hnungtawlin tlang chu an lawn liam a, chumi hnuah chuan thlamuang takin an awm ta a. Anni ka pute, tleirawl rual chuan ramhnuaia zan hnih an tawm bo hnuah chuan khuaa luh leh mai an han tum a, vai sipai an lo duty avang chuan an lut leh ngam lo a, amaherawhchu VC lamin anni rual, tleirawl ho mi 16 te chu MNF lamin tihluihna hmanga ramhnuaia an hruai a ni tia Vai sipai ho hnena report an lo pek tawh avang chuan chuti takin an thinlung a khawih na lem lo ni awm tak a ni.
A tuk maiah chuan Muallianpui In pakhatah hian chung tleirawl ho chu kalkhawm tur tiin hriattirna an dawn takah chuan thuawih takin an kalkhawm a, sipaite pawh chuan kut thlak loin kuli angin an lo chhawrin Muallianpui atang chuan Sangau lamah an thawmhnaw an phurhthlak tir a. Sangau hi 18th Assam Riffle Post a nih avangin chutah chuan anni tleirawl rualte pawh chu an awm tirin nitin hna an thawh tir thin a. Zalen takin an awm a, hna thawh tur awm ang angte an thawkin tuite an chawi thin bawk a, an zinga te deuh bikte phei chuan an tui chawina ber Jerrigan chu amala an zawh loh avangin pahnihin an zawn thin nghe nghe. Sangauah hian thla khat an awmin an khua a har hman viau bawk a, Pathianni tlaiah phei chuan Ni tla tur thlirin an thukhawm fo thin. Ei leh in lamah erawh an duhsak viau a, a tir lamah phei chuan chhunah vawi hnihte chaw an ei nghe nghe a.
Hetiang hian ka pu chuan an chanchin ngaihnawm takin min hrilh a, sipai kut an tuar miah lo hi vannei a intih rualin mak a ti bawk a, sipai ho hi an fel hrim hrim niin a sawi. Muallianpui Pawih veng lam vai sipaiin an hal dante pawh ngaihnawm takin min hrilh bawk.