ZPM Legislature Party (ZLP) chuan State Health Care Scheme hnuaia dam lo enkawlna bill tangte pe chhuak vat turin sorkar an phut a, bill theih zat Rs nuai 1 tih chu a pangngaia Rs nuai 2 thleng bill phalsak turin an phut.
Hemi chungchanga thuchhuah an siamah ZPM Legislature Party chuan state health care scheme chu mi tam takin innghahna atan an hmang mek tih sawiin, hetihlai hian dam lo enkawlna bill tang Rs nuai 4,400 a awm mek thu leh hei hian mi tam tak harsatna a thlen tih an sawi.
MSHCS hnuaia inziak lut mi tam tak inenkawlna senso batsaka pawisa an pek chhuah theih loh laiin sorkar chu restricted tender leh tender pawh awm lova contract pek thulh chuang lovah an puh a, bill tang pe chhuak vat tur leh pawisa awm reng chung si a, bill an pek theih loh chhan mumal taka mipuite hnena sawifiah turin sorkar an phut bawk.
ZLP chuan MSHCS policy khat, October atanga a hun chhiar thin chu sorkar sum calendar anga kalpui tum a nih avangin tunah hian kumin October atanga nakum March chhung atan Rs. 50 (BPL) leh Rs. 500 (APL) inziah luhna manah lak a niin Rs nuai 1 thleng chauh damlo inenkawlna senso a hmuh let theih dawn tih an sawi a, hei hi tha lo an tih thu an sawi.
Covid-19 hripuiin mipuite a tihretheih lai mek leh sum awm reng chung si a, damlote tana bill let tur a chanvea an tihniam chu mipuite tana harsatna lian tak tiin, an dem tak zet tih an sawi a, MSHCS hnuaia inziak lut mekten an inenkawlna senso Rs nuai 2 thlenga an bill let phalsak turin sorkar an phut tih an thuchhuahah chuan an tar lang bawk.