Delhi-National Capital Region (NCR) huam chhunga boruak bawlhhlawh lutuk chungchanga Supreme Court-a thu thehluh ngaihtuah a nih hma lawkin Aam Aadmi Party (AAP) sorkar chuan boruak bawlhhlawh thunun nan hian a tul a nih chuan inkharkhip hmak pawh kalpui turin a inpeih tih a sawi.
Delhi sorkar hian court sang berah hian hetianga kal dan tura an inruahman hi NCR huam chhunga awm, an thenawm state zawng zawngah pawh zawm a nih chuan awmzia a awm ngei tur thu a hrilh bawk.
“GNCTD (Government of National Capital Territory of Delhi) chuan tual chhunga boruak tibawlhhlawh thei tihchhuah nasat lutuk tiziaawm tur hian inkharkhip hmak kalpui turin a inpeih a. Hetiang hi thenawm state-a NCR huam chinah pawh kalpui a nih chuan awmzia a awm ngei ang. Delhi khawpui tiat thlirin boruak dinhmun hi a ziaawm ngei ang,” a ti.
“Hetiang ti tur hian NCR huam chhung chin zawng a huap a ngai a. Chutiang thlir chung chuan India sorkar emaw, Commission for Air Quality Management in National Capital Region emawin NCR huam chhung a tih leh a bul hnai pawh huamin, inkharkhip hmak turin a inpeih,” tiin Delhi sorkarin court-a affidavit a thehluhah hian tar lan a ni.
Delhi sorkar hian environmental activist Aditya Dubey leh dan zirlai, Aman Banka ten boruak bawlhhlawh zel karah court-ah sorkarin lo neitute hnenah a thlawnin meikhu tichhuak tam lo lo halna khawl pe vek tura tura ti tura ngenna an thehluh a chhanna a ni.
Inrinni khan court sang ber hian Delhi-NCR boruak bawlhhlawh dan chu hmalak a hmanhmawh thlak tawh thu sawiin a tul a nih chuan sorkar laipui leh Delhi sorkar chu inkharkhip pawh kalpui mai turin a lo rawn tawh.
Court hian boruak bawlhhlawh dan chu a nasa hle tih sawiin mahni in chhungah pawh hmai tuam?turin mipuite chu a ti.
Delhi khawpui boruak a bawlhhlawh chhan nia sawi – lirthei khu te, halpuah leh halmawi khu te, vaivut te leh lo hal khu tihtlem tuma hmalakna ringawt chuan awmzia a nei tam lo niin court chuan a sawi bawk.
Court chuan sikul hawn a nih bawk si avangin naupangten boruak tha lo hip vangin harsatna nasa tak an tawk thei niin a sawi.