Biak in a zai phal a hun tawh khawp mai!
Mizoram Kohhran Hruaitu Committee (MKHC) chuan hri leng laka himna tura sorkarin inkhuahkirhna thupek a siama ‘Pathian Biak Inkhawma zai phal loh’ tih leh ‘Sunday School-a class lak phal loh’ tih chu paih turin Chief Minister Zoramthanga an ngen thu kan hria a, kan ram hruaitute khawsazia leh thil tih dan thlirin a awm viau mai.
Hri leng hian min la chenchilh reng a, min la kiansan lo tih kan hre tlang theuh. Fimkhur tura kan la inchah lawm lawm lai hian khawpui chhung leh hmun thenkhata ‘mass test’ kan neih hnu atang khan kan inthlah zalen ta mah mah ni hian a hriat a, kan sorkar kal zel dan thlir zui phei hi chuan kohhran lam hian an tih awm tak an ti chho ta niin a lang a ni.
MKHC secretary chuan kohhran tinten hri laka invenna kalpui dan chu an hrechiang thawkhat tawh tih sawiin, sorkarin zai phal pawh ti se mi tam tak hi an zai ngam chuangin a rinawm loh a, chutihrual erawh chuan tuna SOP-a an tar lan dan tawp hi chu a felhlel deuh an tih thu a sawi a; MKHC hian Biak Ina zai phal tawh chu an duh ber a; mahse, sorkar hi zai phal tawh tur tak erawh chuan an nawr lo a, tualchhung kohhran kuta dah turin an ngen tih a sawi bawk.
Kohhran zawng zawng hian Biak in chhunga zai hi an chak tawh a, mah se sorkar berin a la khap lai hian puipunna leh sorkar program hrang hrangah lam leh zai ri hut hut thawm hriat tur leh hmuh tur a awm reng tawh thung a, kohhran hote a la khap bik reng hi hriatthiam a har tawh viauin a rinawm reng a ni.
MKHC lam hian phal vek pawh nise, tualchhung kohhran tam zawk hi chuan anmahni dinhmun thlir chungin an la ngam a rinawm chuang loh an ti a, kohhran te hi mahni veng dinhmun hrechiangtu ber an ni bawk nen, SOP apianga an tan bika ruahmanna hran awm kher thin hi paih a hun tawh viauin a lang bawk a ni. Kan inthlah zalen lai hian fimkhur tlan pawh kan la ngai reng tih i hre fo bawk ang u.