Aizawl: Mizo Grammar Society (MGS) hruaituten nimin khan Human Resources Development (HRD) Board Vice Chairman L. Thangmawia chu a chenna inah hmuin an pawl hmalakna leh rawtna hrang hrangte an thlen.
MGS hruatute chuan Mizo tawng hmasawnna tura Mizoram sorkarin Mizo Language Board (MLB) din tura hma a lak meknaah HRD board vice chairman chu lawmthu an hrilh a. Mizo tawng chungchanga inhnialna tam tak chu grammar atanga chinfel theih a nih thu an hrilh.
MBSE hnuaia Mizo Language Committee (MLC)-in Mizo tawng ziah dan (3rd Edition) a siam chungchangah rawtna an thlen thu MGS hruaitute chuan L Thangmawia chu an hrilh a. MBSE atanga ngenna an dawn bawhzuia pawl 9 atanga pawl 12 inkar Mizo zirlaibu MLC kaihhruaina nena inmil lo an zirchian mek thu leh DDK leh AIR-ah Mizo tawng grammar pawimawhna leh tangkaina lam hawi programme an neih mek thu an hrilh bawk.
HRD board vice chairman chuan harsatna dang a awm loh chuan kum thar budget session-ah Education minister Lalchhandama Ralte-in MLB bill a put luh hman an beisei thu MGS hruaitute chu a lo hrilh a. Hlawh pawh nei lova Mizo tawng chungchanga an hmalakna lawmthu a lo hrilh bawk a ni.
HRD board vice chairman leh MGS hruaitute chuan Mizo tawng hmasawnna tur leh hnam inpumkhatna atan khawvel hmun hrang hranga cheng Zofate nen Mizo tawnga inpawlkhawmna (international webinar) nei tura hmalak tlan an remti a. ‘Remchang hmasa bera he programme huaihawt tura inbuatsaih chhunzawm ni se,’ an ti.