Huntawp dawn goal vangin Serbia an tling, Portugal in playoff an khelh a ngai

World Cup qualifier-ah Portugal an chesual a, tling tura dinhmun tha zawka an dinlaiin inkhel pawimawhah Serbia in an lakah chakna goal an khung a. 2-1 in an mikhualte hi chakin Group A atangin an tling.

Portugal hi an group-ah hian pahnihna an ni a, Qatar pan turin playoff an an paltlang a ngai dawn. Nakkum March-ah group stage a pahnihna team dangte nen an inkhel ang.

Lisbon a Estádio da Luz ah Serbia half-time substitute Aleksandar Mitrovic chuan minute 90-naah chakna goal a khung a. Draw chiah mamawh tawh Portugal hi an tlawm. Inkhel tan tirah Portugal in Renato Sanches hmangin goal an khung hmasa a, hei hi Serbia captain Dusan Tadic chuan first half-ah a sut.

Inkhel zawhah Portugal midfielder Joao Palhinha chuan an rilru na mahse an result chu an phu tawk a ni tih an pawm thu a sawi. “Mawhphurhna kan lak a ngai a, kan khelchhia a, kan pawm a ngai. Second half-ah goal ven bak engmah kan ti lova, Serbia khan fak an phu. Chak thei kan nihlaiin anni kha kan chak tir a ni.”

“Engtiklai pawhin a chak reng theih loh a, harsatna kan hmachhawn hun a awm thin. Tunah pawh hian kan dinhmun hian chakna min la pe zel zawk ang.” tiin a sawi.

Spain an tling e
La Roja in Qatar pan tura an hmun tichiang turin huntawp dawna goal khung an mamawh ve thova, an substitute Alvaro Morata chuan inkhel a goal awmchhun khungin 1-0 in Sweden an hneh.

Estadio Olímpico de la Cartuja-ah Morata hian minute 86-naah goal a khung a. Dani Olmo ball pet kawh tak chu goal ban a fuh hnua a per let lo nang fuhin Sweden goalkeeper Robin Olsen pet khumin goal-ah a khung.

Spain manager Luis Enrique chuan, “Euro ai khan tunah hian kan lakah beiseina a sang zawk niin ka ngai a, hei hian pressure pawh min pe nasa. Kan rilru lamah zam chhe mai lo tura kan inbuatsaih a ngai nasa hle a, player-te an fakawm.” tiin an chak hnuah a sawi.

Spain hi World Cup vawi 22 atang vawi 16 an khelhna a ni dawn a. Hetihlai hian Sweden legend Zlatan Ibrahimovic chuan Spain defender César Azpilicueta a nghawk luih avangin playoff first leg khel thei lo tura hrem a ni thung.

Inkhel dang
Croatia in Stadion Puljud-ah Russia an mikhual a, huntawp dawn lamah Russia player Fedor Kudryashov own goal hmangin 1-0 a chakin Qatar an pan thei dawn.

Tling chiang tawh Germany in Armenia an tlawh a. Midfielder Ilkay Gundogan chuan goal hnih a khung bakah Kai Havertz leh Jonas Hoffman ten goal khat ve ve khungin 4-1 in an chak a. Coach Hansi Flick hnuaiah Germany hi an inkhelh apiangin an la chak ziah.

Leave a Reply

Your email address will not be published. Required fields are marked *

error: Content is protected !!