Ramri chungchangah engtinnge kan awm zel dawn?
Mizoram Home Minister leh a department thu a inhmu lo hi thilmak tak a la ni reng a. Ramri a hmalakna tihtawp a nih chungchangah home minister ber hi a department chan hotu lianten engmah an hriattir ve lo niin a lang a, an ti hrilhhai ngawt mai!
Hetih lai hian a hre lo tak zet a nih chuan engtinnge hmalak a tum tih hi zawhna awm thei tak a la ni bawk. Thuthar thehdarhtute hmaa engemaw sawi leh ringawt a, a taka hmalakna awm zui lem chuang lo hi a tih theih tawk a ni mai ang tih a hlauhawm hle a ni.
Hetiang teh nuaih mai hi kan nih laiin ramri chungchanga nasa taka hma lo la tawh tu, tlawmngai pawl hrang hrang telna, JAC on Inner Line Reserved Forest Demand chuan Mizoram leh Assam ramria status quo vawng thaa ramri hrula hmalakna hrang hrang titawp tura thupek tihchhuah tawh chu sut turin Mizoram Chief Secretary Dr Renu Sharma hnenah thutawp (ultimatum) theh lutin, thupek sut a nih loh chuan a tawp thlenga dodal an tum thu an sawi thar ve leh ta a, anni lam hi chu an rawn kal huai ngam hmel ta khawp mai bawk.
Ramri buai a awm hleka a changtu minister beisei phak loh lutuk thin hi an party chhung atang ngei ngei pawhin duhkhawp lohna a nasa tawh hle nia hriat a ni a, tunah a department chan ngei ngei thuchhuah/thupek pawh a la hriatpui lote hi a mak leh zel a, engtinnge hma a lak zel dawn tih pawh hriatthiam a har ta hle.
JAC lam hian home minister-in ‘ka hriatpui lo’ a tih hi a hriatpui lo tak zet a nih chuan thupek chu cancel leh a, procedure pangngaia Mizoramin transaction of business rules a neih kalphung chuan siam that turah an ngaih laiin, tun thlenga siam that a ni lo chu an zawhna a nih thu a sawi bawk a, engtin tak chhan let ni dawn i maw?
Kan ram leh hnam hi kan hmangaih tak zet a nih chuan politics ball mai mai atana hmang lovin, tun atanga nunna thap huama ram chhan hna hi kan thawk tur a ni zawk dawn lawm ni?