Interlagos-ah Lewis Hamilton-a’n a ropuizia a lantir

Formula 1 world champion Lewis Hamilton-a’n a elpui Max Verstappen chu lap 59-naah a lehpel a. Formula 1 chanchin a intlansiak hmuhnawm takah F1 thawnthu ropui zinga mi ni turin hnehna a chang a, Sao Paulo Grand Prix-ah a tlan chak ber.

Brazil a khawpui lian ber Sao Paulo-ah intlansiak nghah a ni a, Interlagos tia motorsport khawvela sawi thin Autódromo José Carlos Pace tlankawngah Hamilton hian lap 12 a la awmin a khingpui hi a lehpel a, 10-na atanga bul tanin hnehna a chang.

Intlansiak tan atanga hmahruaitu Verstappen hian ani aia tun tuma car nei chak zawk Hamilton hi lap 28-na atang a ven a ngai uluk hle a. A tawpah erawh dang tluan thei lovin British driver a chak a. Verstappen-a’n world title inchuhna a hma a hruaina chu point 14-ah a tihniam.

Thawnthu ngaihnawm ah a changtupa Hamilton
Brazil a intlansiak hi neih tan a nih hma atangin boruak a inmung chho a, world champion nih tuma inumna a ngaihnawm. Middle East a tlankawng te Mercedes car mil zawk tura ngaih an nih avangin Anglo-German team in remchang lak an tum a, Hamilton-a car-ah Internal Combustion Engine thar an vuah. ICE thar avang hian grid penalty hmu in intlansiak bul a tanna tur aia hmun nga a hnungah a tan a ngai.

Inrinni zana sprint race hmanga intlansiak bul tan dan tur zawn a nih avangin Zirtawpni zanah qualifying tlan a ni a. Hetah hian Hamilton hi ICE thar a hman avangin a car a chak fal a, second 0. 438 laiin Verstappen aiin a tlanchak zawk.

Mahse qualifying zawhah Red Bull team chu intlansiak thuneitute hnenah an zualko a, Hamilton-a car ah Drag Reduction System hman a nihin a hnunga a car thla inhawng tur chu dan phal chin aiin a inhawng zau tih hmuh a ni a, Hamilton hi disqualify niin Sprint race-ah a hnung ber atangin a tan. Verstappen chu Hamilton-a car a enna lamah car khawih danglam phal tawh lohna ‘Parc Ferme’ kalpui a nih tawh hnuah a kuta a khawih avangin pawisa chawitir a ni ve thung.

Lap 24 chhung Sprint Race ah Hamilton hian 20-na atang pangana a hauh a. Grid penalty avangin Pathianni zan intlansiaknaah 10-na atang bul a tan.

Red Bull car ten bul tan tha mahse Hamilton-a car tlan chak leh a thiamna dan theih a ni lova, a hma a awmte a tlanpel mawlh mawlh. Lap 71 tlan turah Red Bull hian Hamilton hi ‘undercut’ hmanga tactic a hneh an tum a, pit stop an siam vawi hnihnaah car ke thlak hmasa a an dinhmun siamthat hman an tum a, mahse an khingpui ber a tlan that em avangin a hlawhtling lo.

A hmasa ber atanga bul tan Hamilton-a teammate Valtteri Bottas chuan pathumna a hauh a, Mercedes car set up a fuhna hmunah hian lap 10 vel la awm belh se Finnish driver hian Dutch driver a tibuai hman hle ang.

“Beidawn loh rah kan hmu”
Formula 1 a hnehna vawi 101 a channa niin Hamilton chuan, “Tun kartawpah hian anni nena kan inkar hi nasa taka kan tihzim theih ka ring lo ania, kan lama thil kal lo tam tak a awm. Mahse vawiinah hian beidawng lova beih talh talh chuan hlawhtlinna hi tu ban phakah pawh hian a awm tih hmuh theihin kan lantir.” tiin a sawi.

Leave a Reply

Your email address will not be published. Required fields are marked *

error: Content is protected !!