Kum 2023-ah relin Sikkim kalpawh theih tawh dawn


Sikkim chu India ram hmun dangte nen rel hmangin kum 2023-ah chuan an intlawhpawh theih tawh a beiseiawm.
India ram hmun dang atanga Sikkim thlengkal theihna tur, km 44.98-a thui, Sevoke-Rangpo relkawng siam mek chu kum hnih lo awm leh tur chhungin peih hman a nih a beiseiawm niin thuneituten an sawi.
North-East Frontier Railway general manager Anshul Gupta chuan relkawng siam mek hi tlawhin, “Sevoke-Rangpo rail line hi kum 2023-ah chuan zawh theih a ni ang,” a ti.
Gupta hian hna thawh lai hi Siliguri, West Bengal atanga km 20 vel chauhva hla, Sevoke-ah a enpui a. “A ram inpharh dan rualrem lo tak te, kawr ruam thuk tak tak te leh chet vel harsa tak ni mah se hna hi kum 2023-ah chuan thawh zawh hman a ni ang,” a ti.
Sevoke-Rangpo rail line hi hetih laia Railway Minister Mamata Banerjee chuan kum 2009 khan a siamna tur lung a phum a, hna tan lai kha chuan kum 2015-a zawh hman tura duan a ni.
Railway thuneitute chuan Prime Minister’s office leh Railway Board chuan December, 2023-ah hna hi thawh zawh hman tumin ruahmanna an nei thung tih an sawi.
Hna thawh lai enkawltu, Indian Railway Construction Company chuan thawh tur zawng zawng zinga 30% chu thawh zawh a ni tawh an ti.
Relkawng siam mek hi West Bengal leh Sikkim inkalpawhna tur a ni a, a thawh nan hian Rs, vaibelchhe 1,339.48 ruahman a ni a; mahse, hna thawh kal lai hi tihkhawmuan a nih avangin a zawh fel vek hunah chuan Rs. vaibelchhe 5,000 chuang sen a nih ngei a rinawm.
Relkawng tam zawk, km 41.54 hi West Bengal-a Darjeeling leh Kalimpong district-a kal tur a ni a, a bak km 3.44 vel chauh hi Sikkim ram chhunga kal tur a ni.
A hnaah hian lei verh ngai 14, lei dawh ngai 17 leh station panga awm tur niin station pakhat, Teesta, Kalimpong district-a mi phei chu lei hnuaia awm daih tur a ni.
A kawng zawng zawng zinga 86% chu West Bengal chhunga mi tur niin leiverh 14 zinga 13 zet he state chhungah hian a paltlang dawn a ni.

Leave a Reply

error: Content is protected !!