Mizoramah pianphunga rualbanlo mi 15,000 chuang, 17.8% chauhvin certificate nei


Aizawl: Kum 2011 chhiarpuiah Mizoram pumah pianphunga rualbanlo mi 15,160 an awm a. Pianphunga rualbanlo zirchiannaa tel atangin za zelah mi 17.8 (2,393/13,418) chauhin disability certificate an nei tih hmuhchhuah a ni.
Social Welfare Minister Dr. K. Beichhua kaihhruaina hnuaiah nimin khan SAD Conference Hall, MINECO-ah State Advisory Board on Disability an thukhawm a. He thutkhawma tar lan a nih danin, Social Welfare department-in December, 2018 leh March, 2019 chhunga Mizoram puma pianphunga rualbanlote dinhmun zirchianna, Debashis Mukherjee buatsaih enho a ni a. Kum 2011 chhiarpuiah Mizoram pumah pianphunga rualbanlo mi 15,160 an awm a, zirchiannaah hian mi 13,524 zawnchhuah niin, heng zinga mi 13,418-te interview an ni a, an zinga 106 erawh interview neih an duh lo thung.
Zirchianna tel atanga mi za zelah mi 17.8 (2,393/13,418) chauhin disability certificate an nei tih hmuhchhuah a ni a, disability certificate nei chauhte hi sorkar atanga hamthatna awmte dawng thei an nih avangin, thutkhawmah hian certificate siam chungchangah a rang lama health department nen thutkhawm neih an rel nghal.
|hutkhawmah hian vantlang punkhawmna hmun hrang hrang — biak in, hall, kawngpui sira mihring kalnaah te wheelchair leh rualbanlo dangte kal theih tura siam chungchangah zirtirna neih tam a la tul hle tih tar lan a ni a. Rights of Person with Disabilities Act, 2016-in a phut angin vantlang building hrang hranga pianphunga rualbanlote tana luhna leh chhuahna bik awm lote chu thla hnih (2) chhunga zawn chhuaha rualbanlote tana harsatna awm lo tura ruahmanna siam tura hriattir ni se tiin an rel a. A zawm lote chu dan anga hrem theih an nih thu an sawi.
Social Welfare department leh Differently Abled Society of Mizoram tangruala Covid-19 leng kara pianphunga rualbanlote tana Aizawl leh Lengpui area-a tanpuina an pekte thlir let a ni a. Pianphunga rualbanlote chhawmdawlna atan state fund neih chungchangte rel a nih bakah, vantlang punkhawmna in leh khawlaiah pianphunga rualbanlote tana harsatna awm lo (barrier free) a nih theihna atana department hmalaknate thlir ho a ni bawk.

Leave a Reply

Your email address will not be published. Required fields are marked *

error: Content is protected !!