Motorsport ngainatuten huphurh tak chunga an thlir chu Pathianni zanah a tak ramah a chang a. MotoGP legend Valentino Rossi chuan a intlansiak hnuhnung ber a tlan zova, bike intlansiak a chawlhsan dawn ta.
Vawi 9 world champion ni tawh Italian rider hi Valencia-ah 10-na a ni a. MotoGP tilartu ‘The Doctor’ tia kawng kualah chak tak leh buaina nei miah lova a tlan thiam lutuk avanga hminglem an pek intlansiak hnuhnung berah hian amah tantu leh ngaisangtu entu mipui leh intlansiak ve te zingah an tam.
Circuit Ricardo Tormo-ah tun season a MotoGP intlansiak hnuhnung ber hi nghah a ni a. Yamaha khalhtu Fabio Quartararo chu world champion a nih chian tawh avangin Rossi hming a ring ber.
Ducati khalhtu, Rossi-a hnampui leh VR46 academy atanga a chherchhuah Francesco Bagnaia chuan pakhatna a hauh a. Ducati khalhtu dang Jorge Martin leh Jack Miller ten pahnihna leh pathumna an hauh a, a vawikhatna atan Ducati in MotoGP dawhsan an luah kim.
Bagnaia hi tun season-ah vawi li pakhatna a hauhna a ni a, world champion nih inchuhnaah pahnihna niin a hnehna chu Valentino pual a nih thu a chak hnuah a sawi.
Kum 42 mi Rossi hian MotoGP a vawi 432 intlansiak a hmachhawnnaah 10-na atang tlan tanin top 10-ah a tlan zo thei a. Mipui 75,000 ten rawng eng nen an ‘hero’ hi an lawm.
Intlansiak zawhah Rossi chuan, “Ka rilru zawng zawng ka sawrbing a, chetsual ka tum lo. Intlansiak tawp ber ka tan a nih avangin world champion nih tum ang maiin ka rilru ka seng. Intlansiak awlsam a ni lo bawk a, mahse top 10-ah ka lang thei. Hei vang hian ka bike intlansiak chhungin khawvela a tha 10 zinga telin ka tawp tihna a ni.” tiin fiamthu chungin a intlansiak hnuhnung ber zawhah a sawi.
Urbino, Italy a piang Rossi hian kum 1997 khan 125cc-ah world champion niin kum 1999 khan 250cc-ah a champion leh a. Kum 2000-ah bike inelna sang berah insawnin 2001, 2002, 2003, 2004, 2005, 2008 leh 2009-ah te world champion a ni a. MotoGP bikah dawhsanah vawi 199 a ding pha a, vawi 89 hnehna a chang.