Indian court chuan hmarchhak state, Tripura-a chanchinbumi pahnih, ‘hnam leh sakhaw inhuatna thehdarh’ tia puh vanga mante chu bail-a an chhuah a phalsak.
An pahnih hian tun hnaia Muslim mosque leh an thil neihte suasam an nih chungchang chu chanchinbuah an chhuah a ni.
Chanchinbumi leh an dikna chanvp humhalhtu pawlte chuan man an ni hi nasa taka sawiselin chhuah thuai turin an nawr.
An thawhna, HW News Network pawhin thuneitute chuan an ‘sawisa’ niin an sawi bawk.
Indian network hian Tripura sorkar chuan thil thleng dik tak chhuah phal lovin chanchinbumite a bei ta niin an sawi bawk.
Samriddhi K Sakunia leh Swarna Jha te hi tual chhunga Hindu right-wing activist-ten an hna thila an kal kualnaah Muslim-te hnenah Hindu-te haw tura tihna an sawi nia sawiin thuneitute hnenah an hek a ni.
Sakunia-i’n Twitter-a police hnena an hekna a tar lanah chuan mi phiar leh sakhaw pawl hnih inhuatna tur siamtu anga puh an nih thu a lang.
Sakunia-i hian Twitter-a a tar lan dan chuan an pahnih hian Inrinni zanah an thlenna khualbukah hren phawt niin Pathianni chawhnuah an chhuah a ni.
Mahse, a tukah Assam-ah man leh nghal niin Tripura police kuta hlan an ni tih HW News chuan a sawi.
Tripura-a Gomati district-ah magistrate court chuan Thawhtanni khan bail hi a phalsak a ni.
Tripura-a sakhaw inhuatna thil buaina a chhuah lai khan Twitter-ah mosque suasam hnu thlalak leh video te an tar chhuak a, police-ten hetiang thil hi a thleng tih an hre lo nia tar lan a ni bawk.
Sakunia-i hian Tripura-a a kal hi vau a ni tih a sawi a. Union home ministry erawh chuan thu dik tawk lo sawi niin a tar lang thung.
Tun hnaia Tripura-a mosque beih hi sakhaw thila inhmelmakna pakhat a ni a. Hindu pawl chuan an thenawm, Bangladesh-a Muslim-ten Hindu-te an sawisa tih an hriatin phuba lak nan Muslim thil neihte an suasam ve ta a ni.
Tripura hi Bangladesh-in kil thumah hualin kil khatah Assam nen an inri a ni.
November 13 khan chanchinbumi, Sakunia-i hian Twitter-ah Panisagar khuaa mosque tukverh, fan leh switchboard chhe thlalak dahin ringhlel tak chunga police-in a him tia an sawi avanga a lawiten an siam tha lai a dah bawk.
Mite chu social media-a buaina leh thil suasamna thleng tar lante chu ‘like/retweet’ mai lo turin a hrilh a, chutiang thil chuan buaina a tipunlun thei tiin a hrilh.
Sakunia-i vek hian November 12-ah district danga October 19-a mosque hal nia sawi video dah lehin hei hi police hnena thlen a nih hnuah pawh engmah hmalakna a awm miah loh thu a tar lang bawk.
Police hian hemi chungchang hi an sawi zui duh lo va, Panisagar emaw, district dangah emaw mosque hal a awm lo niin an sawi.
Hetih lai hian police hian Muslim-te beihna thleng anga tar langtu chanchinbumi leh dan hremi eng emaw zat chungah thubuai an ziak lut thung a, thu dik lo thehdarhin buaina an tipunlun niin an puh a ni.
Mi firfiakte laka hman thin dan, anti-terror law an tih hmangin Twitter account 102 zet chu an bihthla a, heng account atang hian thu dik lo thehdarh a nih leh nih loh an en fiah.
Tripura police chet dan enchiang tura Supreme Court-a ngenna lut chu court hian a pawm tawh a, ngaihtuah zui a ni ang.