Aizawl: Champhai district chhung, Hruaikawn leh Mualkawi khuaa chhungkaw palite leilet buh seng lai mek chu tui lianin a tichhia.
Hruaikawn khawtlang hruaitute hnen atanga thudawn danin, tun hnaia ruahsur nasa avang khan Kurung lui chu a lian nasa hle a, hei hian Hruaikawn leh Mualkawia chhungkaw palite leilet chimin, an buh seng lai buhphalte a len bo bakah buh la zai lohte nasa takin a chim chhe bawk.
Tui lianin a tihchhiatsakte hi S Lalramliana leilet, tin 300 hmun; Lalrinzuala leilet, tin 300 hmun; F Lalruatchhunga leilet, tin 100 hmun bakah C Laldingliana, Mualkawi leilet, tin 100 hmun te a ni.
Thudawn danin tui lianin leilet a tihchhiat thenkhat hi an buh an seng mek laite a ni hlawm a, nimin lam pawh khan lui tui hi a la lian hle a, heng leilet neitute hian buh seng tur an nei lo niin thu dawn a ni.
East Tuipui Bialtu MLA Ramthanmawia chuan Hruaikawn khuaa chhungkaw pali leilet, tui lianin a tihchhiatsakte chu sorkar atanga tanpuina awm thei angte pawh a theih chin china ngaihtuahpui a inhuam thu sawiin, Champhai lama agriculture department lam pawh a hmuna enfiah tura a hrilh tawh thu a sawi bawk.