Mizoram Badminton Association chuan ITM University, Raipur leh Gopichand Badminton Academy, Hyderabad- a badminton coaching kal turte leh training nei turte chu Thawhtanni khan Aijal Club-ah thlahna hun a hmang.
Mi 38 training-ah hian an kal dawn a, batch hnihah insiam in Thawhlehni khan batch hmasa zawk ten Mizoram an chhuahsan.
He programme hi MBA Promotional Secretary John Lalrinkima’n a kaihruai a, MBA Promotional Chairman, C.Lalduhawma chuan fuihna thu a sawi a. MBA hminga thil pek kal turte hnenah an hlan.
TATA Trust leh MBA thawhhona hnuaia ITM University, Raipur a lehkha zir pah a badminton coaching kal tur thlanna hi September thla khan Aizawl ah Chief National Junior Coach, Sanjay Mishra kaihhruaina in neih fel a lo ni tawh bawk. He zirna in a kal thei tur hian mi 10 thlanchhuah an lo ni tawh.
Gopichand Badminton Academy a training nei turte hi Tata Trust hmalakna a din, Regional Development Center (RDC), Ramhlun Indoor Stadium leh Serchhip lama coaching kal mek te bakah Mizo thalai beiseiawm te thlanchhuah tel an ni bawk.
Heng RDC a coach-te nen an vaiin mi 28 in training hi an zuk chhim ang.