Assam leh Meghalaya chuan Thawhlehni khan hmun ruk vela an state ramri buaina awm chu kumin kum tawpah ching fel hman tura a tul anga hma an lak dawn thu an puang.
Assam leh Meghalaya Chief Minister Himanta Biswa Sarma leh Conrad Sangma ten thuthar lakhawmtute an kawmnaah a hma lama border committee an lo din tawhte chuan an buaina chin felna tura an hmalakna leh an report-te chu November 30-ah an theh luh dawn thu an sawi.
Chief minister pahnihte hian Thawhlehni vek khan Assam lama Kamrup district huam chhung, Langpih-a state pahnih inrinaa inrem lohna awmna hmuh chu an tlawh dun bawk.
“Committee-te hian anmahni sorkar ve veah report an siamte an thehlut dawn a, hemi hnuah hian lehlam lehlam telnaah kan sawiho leh ang. Hemi hnuah hi chuan a ruangam a lang ruak tawh ang a, thu tawp a siam theih tawh dawn a, tihchhuah a ni ang,” tiin Sangma chuan a sawi.
Sarma hian state pahnihte hian Kamrup, Kamrup Metropolitan leh Hailakandi district hmun 12-a hmun ruka inrem lohna awmte en fela buai dan ching fel turin committee pathum an din thu a sawi.
“A thawh hmasaah hian hmun ruk bika kan harsatna neihte chin fel tum phawt a ni a. Rang leh chak takin, December 30-ah chuan thu tawp a siam hman tawh ang,” a ti.