England in Qatar a 2022 World Cup an khel dawn chiang a. Group I-ah hmahruaitu ni turin San Marino lakah goal 10 an khung.
Stadio Olimpico di Serravalle-ah England hi dinhmun tha taka ding sa in an inlan a, an captain Harry Kane-a’n match hnih chhunga a vawi hnih nan hattrick a siam a. Defender Harry Maguire pawhin goal a khung nawn.
Inkhel tan hnu lawkah Albania laka a tih ang bawkin Maguire-a’n goal hmahruai a tauh lut a, minute 7-naah England in goal an khung nghal. Bukayo Saka ball pet kawh tak chu Filippo Fabbri chuan an lamah a dang lut leh zui bawk a. Minute 27-naah Kane-a’n handball vanga penalty an hmuh chu goal-ah a khung.
Kane hian minute 31-naah Emile Smith Rowe siamsak a khung a, 39-na leh 42-naah goal khung leh bawkin first half chhungin goal li a khung.
Second half-ah England in tha an thlah lova, Emile Smith Rowe -a’n goal a khung hnuah substitute pahnih Tyrone Mings leh Tammy Abraham ten an khung a. Bukayo Saka chuan an goal hnuhnung ber a khung leh bawk.
Kane-a’n kuminah England tan goal 16 a khung tling a, hei hi record thar niin kum 1993 a Ian Wright-a’n goal li a khung hnua England tana goal li khung thei hmasa ber a ni a. Hei bakah hian kum 1957 a Tommy Taylor hnua match hnih chhung a zawna hattrick siam thei a ni.
England hian kum 1964 a USA 10-0 a an hneh hnuah inkhel a goal 10 an khung leh hmasak ber a ni a. Tun World Cup qualifying-ah goal 38 khungin anni aia khung tam an awm lo.
England manager Gareth Southgate chuan, “Kan khingpuite a nem tiin ngaihdan pawh a awm mahna mahse hei hi kan kut a awm a ni miau lova, tih theih a awm lo. Chak tura kan inpekna rilru kha a fakawm a, England player an nih angin theihtawp an chhuah tih kan hmu.” tiin a player-te a fak.
England captain Kane chuan, “Kan dinhmun chiang turin match hnuhnung ber thleng nghah a ngai a, kan beisei anga thil a kal hi thil lawmawm tak a ni. Kan hna kan hlen hi kan lawm.” tiin a sawi ve bawk a. England tana goal khung tam ber ni turin goal nga khung chauh a mamawh tawh.
European champion in playoff an khel dawn
European champion nilai Italy chu Qatar pan turin an la chiang lova, Group C atang an tling nghal thei lo.
Azzurri hian Windsor Park-ah Northern Ireland an tlawh a, chak bakah Switzerland aia goal khung tam an mamawh laiin goal inpe lovin an inhnehtawk a. Hei vang hian Swiss team an tling ta zawk.
Lucerne-ah Swiss team hian 4-0 in Bulgaria an hneh a, hei vang hian Italy in March thla ah playoff an khelh a ngai dawn a. Kum 2018 World Cup ah playoff a an chetsual avangin an khelpha tawh lova, hei vang hian Italy tan kawng la inhawng mahse chetsual theih a la ni tih a chiang.
Northern Ireland hi mahni mual hmang thiam, football lama ram tha zawkte laka inveng thiam an ni a, a zawnin an mualah match li goal an chhuah tawh lo. Tling thei ni tawh lo mahse tlawm an tum lova, Ciro Immobile awm loh avanga striker mumal nei lo Italy tan goal nawr nat a harsa zual.
Giovanni Di Lorenzo leh Federico Chiesa te chance neih bak goal hlauhawm chiang tak Azzurri in an nei hleithei lova, lehlamah Northern Ireland in goal nawr na ngam lo mahse George Saville hmangin Italy an barakhaih teuh.
Italy coach Roberto Mancini chuan, “Tunah kan dinhmun hi thlak danglam theih a ni tawh lova, kan pawm a ngai. March ah hmabak kan la nei a, kan theihtawp kan chhuah ang. Tunah tak chuan goal khung kan harsat a, inkhel thunun zawk thin mah ila chance kan insiam thei lo. Northern Ireland kha an defence vek a, hetiang team hi thiah kan harsat zual.” tiin a sawi.
Poland pawhin playoff khel dawn
Group I-ah Poland chu an mikhual Hungary lakah 2-1 in an tlawm a. Pahnihna an hauh.
Captain Robert Lewandowski an chawh hahdam tir zanah England result avangin Poland dinhmun a chiang sa tawh a. Hungary tan András Schäfer leh Dániel Gazdag ten goal an khung a. Poland in forward Karol Swiderski hmangin goal khat an khung ve.