2022 kum tawp lamah Toyota Hilux lo luh beisei

Auto Corner
by Ruata

2022 kum tawp lamah Toyota Hilux lo luh beisei

Toyota lifestyle pick-up truck mawi leh tha tak mai Hilux chu kum 2022 kumtawp lamah India ramah a lo luh beisei a ni a, a lo luh hunah chuan a elpui tur chiangsa chu Isuzu D-Max a ni dawn a ni.

Lifestyle pick up truck kan tih hi lirthei huang khat a ni a. Mahindra Bolero Camper te pawh hi hetiang huanga chhiar theih hi a ni awm e. Heng lirtheite hian a tlangpuiin pick up truck design nei siin a chhung pawh car changkang angin a mawiin a kentel te pawh hmanraw changkang tak tak a ni a. A lirthei a sei thin bakah a four wheel drive system a nei tlangpui bawk a. Toyota Hilux te, Isuzu D-Max te phei chu a to pawl leh changkang pawl a ni tawh a, a aia to fe leh changkang fe pawh khawvel lirthei market-ah chuan a awm tam hle a ni.

Hilux chu le
Toyota Hilux hi India ramah nghakhleltu an tam hle a. Hetianga a lo luh tur thuthang a awm tan hi thil lawmawm tak te pawh a ni awm e. Report thenkhat chuan Hilux lo lut tur hi chi hnih – Hilux leh Hilux Revo tein a lo chhuak dawn an ti a. Hilux hi Rs. Nuai 18 chho bawr vel man a ni ang a, Hilux Revo zawk hi Rs. Nuai 25 bawr vel a nih an beisei bawk a, heng a man tarlan te hi ex-showroom price a ni a, lei dawn chuan thildangte nen chuan heng a man tarlante ai hian a to daih dawn a ni.

Toyota Hilux hian tuna ram pawna an hralhchhuah mek model hoah chuan India rama Toyota lirthei chhuak mek leh lei hlawh em em pahnih Fortuner leh Innova Crysta te hman ang IMV (Innovative International Multi-purpose Vehicle) platform a hmang ve tho a, hei hi India ramah pawh a hman chhunzawm zel hmel.

A khawl
A khawl lamah chuan Toyota Hilux hian 150bhp power pechhuak thei 2.4L diesel leh 204bhp power pechhuak thei 2.8L diesel khawl te a neih hmel a. A khawl te deuh, 2WD (two-wheel drive) system chauh nei pawh a man tlawm ber ni turin an tihchhuah ve a beiseiawm bawk.

Hetihlai hian a hmasa tarlan a khawl lian pahnihte hi chuan 2WD leh 4WD nei te duh-thlan tur an neih ve ve hmel a, transmission lamah hian manual leh automatic transmission duhthlan tur a awm theih hmel bawk.

International market lamah chuan Hilux hi khawl chi thum (3) – 2.7L petrol (164bhp/245Nm), 2.4L diesel (145bhp) leh 2.8L diesel (201bhp) – leh gearbox duhthlan tur – 5-speed manual, 6-speed manual leh 6-speed automatic ten a awm a. Toyota Hilux hi 5285mm a sei, a vang 1815mm leh a san zawng 1855mm te a ni bawk a ni.

A kentel tur hrang hrang
A platform mai bakah hian Toyota pick-up thar tur hian a feature leh component hrang hrangah Innova Crysta leh Fortuner ta hi a rawn tawm nual dawn a.

A feature hrang hrangah hian 8-inch touchscreen infotainment system thar, Apple CarPlay leh Android Auto connectivity, 4.2-inch TFT display, 6-speaker audio system, power adjustable driver seat, cruise control, automatic AC unit rear vent awm tel bakah smart key, push-button engine start/stop awm tel leh adangte a nei dawn.

Ramdang market thenkhatah chuan Hilux hian ADAS (advanced driver assistance system) a nei a, India ramah hian a rawn kengtel ve dawn em a la hriat chiah loh a ni. Himna lamah chuan airbag pasarih (7), hill start leh hill descent assist, vehicle stability control, rear parking camera, sensor awm tel leh traction control te a awm ang.

Hilux elpui tura ngaih leh tun dinhmunah chuan awmchhun ni rih Isuzu D-Max hi lirthei tha tak, Mizoramah pawh awm ve nual a ni a. Ramdangah chuan intihhlimna leh zin veivah na hrang hrang offroad adventure, overland trip leh adangteah hman a ni nasa em em a, a four wheel drive system tha tak hi kawng chhe turu tak taka tlanpui atan pawh a tha em em a ni.

Hetiang ang tak erawh hi chuan keini state chhungah chuan kan la hmang chhuak zo chiah lo thei a. He lirthei tha tak nen hian Hilux hi a theihna, a khawl leh thil hrang hrangah a intluk em em mai a, D-Max ang chiah hian thil hrang hrangah hnam dang leh ramdang mite chuan an hmang nasa hle a, Japanese company tha tak an ni ve ve bawk a ni.

Lifestyle pickup truck lei tumte tan chuan belhchian leh nghah chi tak a ni.

Leave a Reply

Your email address will not be published. Required fields are marked *

error: Content is protected !!