Netherlands in Qatar a World Cup finals khelh turah an hmun an tichiang a. Norway lakah hnehna changin an khingpuite erawh an tel dawn lo tih a chiang ve thung.
Rotterdam a inkhelah Netherlands hian an mikhualte lakah hian Tottenham Hotspur forward Steven Bergwijn leh Barcelona star Memphis Depay te goal khung hmangin hnehna an chang a. 2-0 a chakin Group G-ah an sang ber.
Oranje an chesual tawh lo
De Kuip a inkhelah hian ram pahnihte hi an fimkhur a, inkhel tawp dawn lama goal lutte tih loh chu goal hlauhawm mumal a tam lo.
Kum 2018 a Russia a World Cup khel pha lo Netherlands hian inkhelah hun tam zawkah an fimkhur avangin nidanga an football hlauhawm khelh thin ang an khel thei lova. An tlarhma a khelte tlanchakna leh midfielder te ball pass thiamna hmuh tur a tam lo.
Mikhual lam pawh hi an striker rinrawl Erling Braut Haaland an chhawr theih loh avangin an tlarhma a bil a, second half-ah Netherlands goal-ah vawi hnih chiah ‘shot’ an nei. Minute 84-naah an tlarhnung veng tha viau mahse Bergwijn-a’n an lakah goal a khung a. He goal hi sut tuma na taka goal bawh an tum hnuah Depay-a khung tur Bergwijn bawkin a siamsak leh a. Norway hian playoff an khelpha lo chiah bawk.
Dutch team hi manager Louis van Gaal hnuaiah Qatar-ah an inlan dawn a. Pathianni a bike a chesual Van Gaal hian a hmunah wheelchair atangin a naute inkhel hi a en thova. Kum 2014 World Cup a pathumna nihpui tawhtu coach hnuaiah Oranje an chesual nawn tawh lo.
Norway hian kum 1998 a France a World Cup an khelh hnuah finals hi an la khel leh lova, European Championship pawh kum 2000 hnuah an la khel leh lo.
“Kan tum angin kan khel”
Inkhel zawhah Louis van Gaal chuan Montenegro laka an hmahruaina an humhim zawh loh tawh avangin an chetsual leh mai a hlauh hman thu a sawi a. “Kan team in kan tum ang takin a tawp thleng kan khel. A hnung lamah nghet turin kan ding khawm tlat a, tun tumah chuan a tawp thleng inkhel kha kan kaihruai a, hei hi kan chakna a ni.” a ti.
France vangin Finland an tla
World champion ni lai France in tling chiang tawh ni chungin Finland an tlawh a. An player tha te chhawr thovin 2-0 in hnehna an chang.
Helsinki Olympic Stadium-ah Karim Benzema chuan substitute bench atangin goal hmahruai a khung a. Hei hi Kazakhstan laka goal li khung Kylian Mbappe chuan a belhchhah leh bawk.
France hian an match hnuhnung 18-ah goal an la khung vek a, kum 1999-2000 chhunga an ram record an siam an tluk leh chiah. “Hnehna nen a tawp khar kan duh a, kan tum angin kan hlawhtling. Tunah chuan World Cup finals atan kan rilru kan sawrbing thei tawh.” Benzema chuan a ti.
Finland erawhin Qatar an pan dawn lova, playoff khelhphak la inbeisei mahse Ukraine in Bosnia chu 2-0 a an hneh avangin pathumnaah an tla thla.
Ukraine tan hian Oleksandr Zinchenko leh Artem Dovbyk te chuan goal an khung a. An group ah point 12 an hmu.
Inkhel dang
Group E-ah Belgium leh Wales te 1-1 in an inhnehtawk a, Wales hi Group E atang playoff khel turin an tling.
World number one ni lai Red Devils tana Kevin de Bruyne goal khung chu Kieffer Moore chuan a sut a. Czech Republic in Estonia hneh mahse point khat an hmuh belh avangin Wales dinhmun a chiang.
Group G-ah Netherlands hnuai chiah a awm turin Turkey in Montenegro-ah hnehna an chang a. Kerem Aktürkoglu leh Orkun Kökcü te goal khung avangin 2-1 in an chak.