New Delhi a\anga India-in a thunun chin Kashmir-ah tun hnaia venhim hna thawktuten mi pali an thah, pahnih phei chu civil mi nia sawi chu sorkarin chhui chianna tur thupek a chhuah.
Civil mi nia an sawi pahnih chhungte, chanchinbumi leh mihring dikna chanvo humhalhtuten khawpui lian ber, Srinagar-a he thil thleng duh lohna leh an ruang pawh an chhungte hnena pek kira Islam dana vui an phutna an lantir hnuah Ningani khan chhuina tur thupek hi tihchhuah a ni.
Police hian civil mi an thah pahnih – sumdawngmi, Altaf Ahmad Bhat, 48, leh kum 40 mi, dental surgeon leh real estate dealer Mudasir Gul-a chhungte eng emaw zat an hreng zuia; mahse, Nilaini zan khan chhuah an ni tawh hlawm.
Police thuneitute chuan thi dang pakhat hi kum 22 mi, Amir Magray-a a nih thu leh helho inthuamin ralthuam pawh a keng niin an sawi a; mahse, a chhungte chu inhlawhfa mai a nih thu an sawi a. Thi dang leh hi chu Pakistani niin an sawi a; mahse, thuneitute hian finfiahna engmah an sawi lang lo thung.
Police chuan Bhat leh Gul te hi Srinagar-a Hyderpora venga shopping centre-ah helho nia hriat nen an inkahnaah kah fuh palh an ni tih an sawi.
Hetih lai hian an chhungte chuan dawt a nih thu sawiin, venhim hna thawktute hian inphen nan an hmang a, rawng taka inthahna a ni chiang niin an sawi.
Ningani khan Lt. Governor Manoj Sinha chuan magisterial inquiry tih a nih dawn thu Twitter-ah a puang a. “Engmah dik lova tih a awm lo vang,” a ti a, a bak a sawi lo.
Thi chhungte leh Kashmiri tam tak erawh chuan sorkar thiltih tum chu boruak sa lutuk tihdaih nana hmai phih tumna mai a nih thu an sawi ve thung.
“Dikna chauh kan beisei a ni lo va, kan chhungte ruang hmuh kha a ni kan duh,” tiin Bhat-a chhungte zinga pakhat chuan Al Jazeera a hrilh.
Jammu & Kashmir Coalition of Civil Society (JKCCCS)-a mi, human rights activist Parvez Imroz chuan sorkar thiltih tum chu civil mi thahna lam miin an ngaihtuahna a\anga an rilru lak pen tumna a nih thu a sawi.
“Heng chhuina hi a rintlak lo va, inphih fai tumna mai a ni,” a ti a. “Kum 30 liam ta chhung khan hetiang chhuina thupek hi vawi tam an chhuah tawh a, engmah rah a chhuah ngai lo. Inquiry officer-te hi sorkar hnthawk an ni a, a hrana chhui an ni lo,” a ti.