PC Thang Zikpuia MLC lehkhabu ‘Mizo Ṭawng Ziah Dân’ (3rd edition) han bih chian hian ziah dân tura an dah tam tak hi grammar aṭanga lo bih chiangtute tâna mak tih tur hi a tam angreng riau a; hei vàng hian Mizo ṭawng ziah dân dik zir duh kan ṭhalai tam takte tän pawh rinrawla neih a harsa ṭhin niin a lang. Tun ṭumah chuan phek 205-na kha han keu chhin ula, khatah khân noun thumal ‘thu’ hi adjective nen ziah zawmin ‘thufing, thubuai, thuchhia, thurûk, thukhat, thuthangvâ, thupawi…adt.’ tia an rawn ziah zawm chíam kha in hmu ang a, khatianga noun thumal ‘thu’ hi adjective nena an rawn ziah zawm vak lâi khân, phêk dangah te erawh chuan he noun thumal vêk ‘thu’ hi adjective dang nen chuan an rawn ziah zawm duh leh lawi lo a, ‘thu mûm, thu mak, thu tluang, thu un, thu ṭha, thu dik, thu dang, thu buluk…adt.’ tiin a inzawm lovin an ziak leh daih lawi a! Adjective thumal rau rau si kha a ṭhenah noun nena an ziah zawm lâiin, a ṭhenah an ziah zawm lawi lo a. ‘Uifing’ tia an ziah lâiin ‘mi fing’ tiin an ziak hrang lawi a, ‘thubuai’ tia an ziah zawm lâiin ‘ram buai’ tiin an ziak hrang leh daih a, ‘hrichhia’ tia an ziah zawm lâiin ‘hmul chhia’ tiin a inzawm lovin an ziak leh daih bawk a! Hetianga noun leh adjective rau rau ziah dân kal phung mumal awm lo ang maia a ṭhen ziah zawm a, a ṭhen ziah zawm lawi si loha an rawn dah hi hmuh tur a awm zut mai a ni. Kan zir lâi duhawm tak takte’n MLC lehkhabu keuin, chuta ziah dân tura an dahte chu entawn an han tum a, thumal ang maia noun leh adjective ziah zawm an han hmu a, chûng chu entawna noun leh adjective ziah zawm ve an tum mêk lâiin, a ṭhenah noun leh adjective ni ve tho si, ziah zawm loh an han hmu leh bawk si a! Chûngah chuan kan ṭhalai leh kan zir lâi tam takte’n ‘noun’ leh ‘adjective’ hi Mizo ṭawngah engtia ziah tur nge tih an hre ta ṭhin lo a, mahni duh chin chinah ziah zawm àwm an tih chin ziah zawmin, ziah zawm àwm loh an tih chin ziah zawm loh mai kha a thiang ta emaw te an tih phah ta ṭhin a. Chu chuan Mizo ṭawng ziah dân tur inkawh hmuhna kawngah harsatna lian tak a thlentir ta ṭhin a ni. Grammar dânah chuan ‘adjective’ chu ‘noun’ sawi fiahtu a nih avàngin, noun leh amah sawi fiahtu adjective chu ziah zawm ngai a ni lo a, ziah zawm lohin ‘noun phrase’ a ni ṭhin a. MLC-in noun thumal leh adjective thumal ziah zawma thumal anga an rawn dah pawh hi ‘thu fing, thu buai, thu chhia, thu rûk, thu khat, thu thangvâ, thu pawi…adt.’ tia a inzawm lova ziaha ‘noun phrase’ an nih hian a dik ta zâwk a. Hetianga grammar aṭanga ziah dân kal phung dik a awm reng lâia noun leh adjective inkawp ṭheuh ṭheuh si, duh duh thumal atâna ziah zawm a, duh duh kan ziah zawm loh mai mai reng chuan Mizo ṭawng ziah dân hi eng tikah mah a mumal thei ngai dâwn lo a; chuvàngin, noun leh adjective ziah zawm ngâi tlêm tê, ‘chawhlui, hmelṭha, hmelchhia, lungchhia, thinchhia, mangṭha, mangchhia, zakzum, pawndum, pawnchhia…adt.’ tih ang chite tih loh hi chu Mizo ṭawngah hian noun leh adjective hi ziah dân kal phung inang tlânga ziaha, noun phrase an nih hian a dik zel ṭhin tih hi kan hriat a hun ta tak zet a ni. Chuvàngin, MLC hian an lehkhabu-a mumal lo zeta a ṭhena noun leh adjective ziah zawm a, a ṭhena ziah zawm lawi si loha an rawn dah chiri nuaih hi grammar aṭangin han bih chiang leh thei sela, ‘noun phrase’ tur an ni tih an hmu fiah ve maiin a rinawm.