Delhi Environment Minister Gopal Rai chuan Delhi-a boruak bawlhhlawh zinga 31% chauh khawpuiin a tum a nih thu leh a dang 69% chu a pawn lam atanga lut a ni tih a sawi a. Khawpui boruak bawlhhlawh tiziaawm tur chu sorkar laipui tel lo chuan a theih loh tih a sawi.
Minister hian Delhi-a think tank pakhat, Centre for Science & Environment-in report an siam chu sawi chhuakin anni hian Ministry of Earth Sciences hnuaia System of Air Quality & Weather Forecasting & Research (SAFAR)-in an zir chianna chu an innghah nan an hmang ve thung.
“October 24 leh November 8 inkar chhunga SAFAR-in data a neih rinchhana CSE report siamah chuan Delhi-a boruak bawlhhlawh hi khawpui chuan 31% chauh thawhin a dang 69% hi a pawn lam atanga lo lut a ni a. Report hian 2016 TERI data-a Delhi-in 36% leh a pawn lam atanga lut 64% tih pawh a mil hle a ni,” tiin Ningani khan a sawi.
“Kan beih hi a hautak a, a dang 70% vel hi sorkar laipui leh a viltu dangte nena tanho loh chuan tihtawp theih a ni lo. Data atangin kan boruak bawlhhlawh tam zawk hi pawn lam atanga lut a ni a, miin a mi chengte hi min bei ngawt thin,” a ti.
SAFAR-in a chhinchhiah dan chuan Delhi-a boruak hi ni nga chhung a zawnin Ningani pawh khan ‘chhe tak’ dinhmun a la ni.
Air Quality Index lamah erawh Nilainia 379 chu 362-ah a tla hret.
Delhi-ah hian boruak tihziaawm nan November 21 thleng sorkar pisa chu in lama hna thawh tur a ni a. In sak leh thiah pawh November 21 thleng khap niin zirna in pawh thu leh awm hma chu khar rih tur a ni bawk.