Kan kalphung hi siamthat ngai a va tam ta em!
Minister pakhatin induhsakna uchuak tak vangin a chhungte hna a pe nia thuthang awm chuan mitin rilru a luah a, hmanni lawka eirukna nei lo leh court a thiamchang ta kan sawi zui ang maiin a thleng ve reng tura ngai pawl an awm bawk. Kan ram retheihzia leh hmasawn kan la ngaihzia kan tlangaupui dum dum thin laia dan dik lo hreta thiltihna a awm leh thin hi a pawi a, ram hruaitute hnen atanga chhuak a ni leh zelte hi a pawi thin ngawt mai.
Pathian hming lah hi a nazawngin kan lamthla zen tawh thin bawk nen, kan rorel dan chu kan rorelna dan a nimai tih ringawt changchawia thulak fo hi a fuh lo a, kan chunga roreltu hian min relsak ve thut ang tih talte hi hlauh a hun ta!
A hrim hrimin dan dik lo deuha hna lak leh hnathawh awm thin hrim hrimte hi kan la kalsan hlei thei meuh lo chu a ni ber a. Ram hruaitute hi a bul chu an ni chiang a ni. A nawrtu lam chuan engtipawhin lo nawr thin mah se, hming ziah hnan duh thin an lo awm lehzelte hi a pawi a, ram hruaitu ni tlak niin an lang hlawl lo.
Hri leng vangin kan buai a, sorkar in sum harsat phah nasat thu mipuite min sawikhum fo a, mipuiten thu kan awih em em laiin an duhna leh an sahmim tihpuar theihna lamah chuan kawng an sial miah miah zel thungte hi a pawi a, mipui an zah loh pawhin an Siamtu tal hi chu zahthiam thin se a va tha em.
Kalphung thar a ni emaw, langtlang sorkar a ni emaw, mipuiten kan duh ber chu hmasawnna rualkhai leh mirethei ber hnen thleng phak hmasawnna a ni. Mahse, kan tun dinhmun thlir hi chuan chutiang chu kan la hlat hle thung. Ram siamtha tur chuan beih ngai lovin ram hruaitute atangin insiamthat nghal a hun e.