Lok Sabha MP C Lalrosanga’n nimin khan Raj Bhavan, Aizawlah Larsap Hari Babu Kambhampati kawmin, Mizoram tana thil pawimawh hrang hrang an sawi dun.
C Lalrosanga chuan Mizoram project pawimawh tak tak central sorkarah a la tangkhang mek tih Larsap chu hrilhin, DoNER ministry-ah phei chuan Mizoram sorkarin project a thehluh te nawrkal ngai tak tak a awm nual thu leh amah pawhin vawi tam tak a nawr tawh thu a sawi a. Project thenkhat hmanh-mawhthlak te a awm avangin a nawr kal kawngah Larsap chu theihtawp chhuah turin a ngen.
Assam Rifles te Aizawl atanga Zokhawsanga insawn tura an muangchang lutuk chu tha lo a tih thu Lok Sabha MP chuan Larsap chu hrilhin, Mizo mipuiin insawn thuai se an duh niin a hrilh a. Hemi chungchangah hian Larsap chu inrawlh tura ngenin, Assam Rifles-in chhuanlam tur an nei tawh lova; an DG pawhin fur tui a hul hunah insawnchhuah an tum tih a hnenah a lo sawi daih tawh niin C Lalrosanga chuan a sawi.
Larsap chuan Mizoram MP te tun aia nasa zawka tan la tura lo ngenin, MP fund te pawh a zavaia hmasawnna hnathawna atana hmang turin Lok Sabha MP C Lalrosanga chu a lo ngen tih sorkar thuchhuahin a tarlang a. Mizo tawng 8th schedules-a telh tura a theih anga hmalak a tum thu pawh lo hrilhin, Mizoram MP te pawh an theih anga tan la tur leh hemi kawnga aw chhuah ring turin a lo ngen.
Kaladan multi-modal transit transport project tangkai dan tur leh he project hnathawh peihfel thuai a nih theih dan tur te pawh Lok Sabha MP leh Larsap chuan an sawidun bawk a ni.