Aizawl Municipal huam chhung local council paruka bye-election nei turin a buaipuitute an inpeih thawkhat tawh. State Election Commission (SEC)-in inthlan a puan hun nghah mek a ni.
Zawhna chhangin District Municipal Election office-a thawktute chuan Zemabawk, Laipuitlang, Venghnuai, Armed Veng, Tuithiang leh Republic veng local council bye-election neih hun tur hi SEC-in a la puan loh avangin inthlan hun tur hriat theih a la ni lo va. Chawlhkar thar lamah chuan puan theih mai an rin thu leh kumin Krismas hmaa local council bye-election kaihhnawih hi zo fel hman tura an inbuatsaih mek thu an sawi.
Nimin khan SEC Mizoram thuchhuak anga Republic veng tih loh veng dang panga local council electoral roll summary revision 2021 neiha final electoral roll chu Aizawl district election officer, bawrhsap Dr Lalhriatzuali Ralte chuan a tlangzarh a. Final roll hi political party tin hnenah sem nghal a ni.
He’ng local council panga huamchhungah hian polling station 15 awmin, vote nei 15039 an awm a, hmeichhia 7989 leh mipa 7050 an ni. Draft roll aiin final roll ah hian mi 23-in an tam zawk a, mipa aiin hmeichhe voter 939 in an tam zawk.
Local council bye-election neihna tur dang pakhat, Republic Veng local council final electoral roll hi March 31, 2021 khan tihchhuah a lo ni tawh a. Polling station pathum awmin vote nei 3118 an awm a; hmeichhia 1700 leh mipa 1418, mi pakhatin final roll-ah hian an tam zawk a, mipa aiin hmeichhia voter 282-in an tam zawk a ni.
Bye-election neihna turte hi local council member boral leh hmundanga pasal nei hmeichhe member te seat ruak a ni hlawm a. Republic Veng local council bye-election hi chu inthlan hun ruatfel tawh, Covid-19 hri leng avanga \hulh leh tak niin, hemi atana ballot paper-te pawh siam vek tawh a ni a, strong room-ah dah\hat mek a ni.