Mizorama Nauban awmte vawnthata leh an chanchin zirna hmun tur Mizoram Orchid Centre, Maubuang ami chu nimin khan Rural development minister Lalruatkima’n a hawng.
Sorkar thuchhuahin a tarlan danin Mizoram Orchid centre hi Shyama Prasad Mukherjee Rurban Mission (SPMRM) hnuaia Rs. nuai 390 senga Mizoram Technocrats, Tuikhuahtlang, Aizawlin an siam a ni a. Mizorama awm Nauban chi hrang hrang lakkhawma, vawnthata, tissue culture hmanga tihpun leh an chanchin te zirna tura ruahman a ni.
Mizoram Orchid centre-ah hian laboratory changtlung tak awmin, tissue culture tih theihna khawl chi hrang hrang bun a ni a, staff quarters, green house hrang hrang leh guest house te a awm a. Zoawi Orchids-in an enkawl zui ang a, Nauban lakkhawm chu BIOCONE-in an buaipui thung dawn a, Mizorama Nauban chi 350 chuang chhinchhiah a ni tawh a, a then te chu mang thei mai(threatened leh rare species) dinhmuna ding mek te niin hengte pawh hi Orchid centre-ah hian sengluha tihpun tum a ni bawk.