- MNF vigilance department leh legal board in hnathawh mumal lo chhuichiang turin Lokayukta-ah FIR thehluh tum
MNF vigilance department leh legal board-in Swadesh Darshan-II sum hmanga hnathawh Durtlang – Chaltlang Ropeway siam leh Sakawrhmuituai tlanga Skywalk siam hnathawh mumal lo chhui chiang turin Lokayukta-ah FIR thehluh an tum.
Nimin khan MNF vigilance department leh legal board hruaitute chu Aijal Club-ah an \hukhawm a, Swadesh Darshan – II pawisa hmanga hnathawh Durtlang to Chaltlang Ropeway siamna tur leh Sakawrhmuituai tlanga Skywalk siamna tur pawisa tam tak contractor hnena pawisa pek a ni tawh chunga hnathawh mumal a awm loh avangin chhui chian ngai an ti a, thil nihna dik tak chhui chiang turin Lokayukta ah FIR thehluh nise, an ti.
An \hutkhawm zawhah Legal Board Secretary David R Lalsawmtluanga chuan hma an lak dan tur leh Swadesh Darshan II hnuaia sum tih ching pen awm dan te chanchinbu mi hmaah a sawifiah.
David R Lalsawmtluanga chuan, Chaltlang leh Durtlang inkara ropeway siamna tur atan kum March 7, 2017 khan sorkar laipuiin Rs nuai 1241.29 chu Mizoram sorkar a pe tih sawiin, hetihlai hian contractor hnenah erawh central lamin sum an pek aia tama Rs nuai 1317.80 pek a ni thung tih leh central a\anga sum dawn aia tam contractor pek a ni chu mak an tih thu a sawi.
Hetianga contractor an duhsak lai hian hnathawh tur zawng zawng a\anga chhuta zaa 4 chauh contractor hian a thawk tih David R Lalsawmtluanga chuan sawiin, “Rs nuai 1317.80 pek a nih laiin a hnathawh erawh suma chan tirin Rs nuai 99 man chauh a ni a, thil dik lo chu a awm ngei a ni,” a ti.
David R Lalsawmtluanga chuan, Sakawrhmuituai tlanga Skywalk siam turah central sorkarin Mizoram sorkar hnenah Rs nuai 242.50 a rawn pe a, hetihlai hian central-in sum a rawn pek aia tam Rs nuai 283.50 lai chu state sorkarin contractor a lo pe chhuak tih sawiin, hetianga a nih lai hian contractor-in a hnathawh erawh zaa panga chauh a ni tih a sawi.
Sakawrhmuituai tlanga Skywalk siam tura rawih contractor hi Rs nuai 283.50 pek a nih laiin hna an thawh tawh hi suma chhutin Rs nuai 24.25 chauh a ni thung tih a sawi a, “Department lamin Contractor hi hna thawk chhunzawm turin nawr viau mahse hna a thawk duh tawh lo,” a ti.
MNF party secretary vigilance department leh legal board-a hruaitu ni kawp chuan, Swadesh Darshan-II sum hmanga Mizoram Tourism hmasawnna tura hnathawh tur sum lo kal te tihchingpen a nih dan dik tak chu mipuiin an hriat a \ul tiin, Lokayukta-ah FIR theh luh an tum a, kar thar lamah FIR chu an theh luh theih an beisei tih a sawi bawk.