Austria chuan invenna la ve lote bik inkharkhip a puan hnu lawkah, ram pumah Covid-19 hri kai pung chak leh mek avangin Thawhtanni atang hian inkharkhip an kalpui dawn.
Chancellor Alexander Schallenberg chuan a rei berah ni 20 inkharkhip tur a nih dawn thu leh February 1, 2022 atang chuan invenna lak chu dan anga kalpui a nih tur thu a sawi.
Austria-ah hian ni khata hri kai tam ber ni tawng mekin Europe khawthlang lamah chuan invenna la la tlemna ber zinga mi a ni bawk.
Europe ram dangte pawhin hri kai pung thar leh mek avangin inkhuahkhirhna an kalpui thar leh hlawm bawk.
“A thawh ngana lo thlentir kan duh lo,” tiin Schallenberg-a hian an rama province pakua an neiha governor-te nen an ram khawthlang lam chawlhna hmuna an thutkhawm hnuah a puang.
Hun rei tak chhung mipuite chu invenna la tur leh ‘ngei ngei tur’ tih ang zawnga kal chu an pumpelh rih tih chancellor chuan a sawi bawk.
Hetia ‘ngei ngei tur’ tih a awm loh avang hian mi tam takin lak an tum lo tih a sawi a. A chhan ber chu politics khelh nan te, invenna duh loh hrim hrim vang te leh thu dik lo thehdarh vangte a nih thu a sawi a. ‘Ngei ngei tur’ anga kalpui tura inkaihhruaina erawh la peih a ni lo thung.
Chawlhkar liam ta chhung khan Austria-ah hian mi 1,00,000 zelah mi 990.7-in hri an kai ang a. Health Minister Wolfgang Mückstein chuan ‘inkharkhip chu an duhthlan theih hnuhnung’ a nih tawh thu a sawi.
Inkharkhipna kalpui chhung hian Austrian-te hi in lam atanga hna thawk tura tih an ni a, ni tin mamawh zawrhna dawr tih loh khar tur a ni a, sikulte chu kai ngei ngei ngai ang chi tan chauh hawn a ni dawn a. December 12 thlenga kalpui turin an inruahman phawt a; mahse, ni 10 hnuah an ennawn leh phawt ang.
Austria hi European Union ram zingah thlasik lo thleng meka inkhakhip kalpui hmasa ber tur an ni.
World Health Organization hnuaia Europe regional director Hans Kluge chuan tun thlasik hi a khirh dawn tih a sawi a. Miin invenna an la duh lo leh inkai darh awl tak, Delta variant laka him tura dan zam zawm loh lutuk vang niin a sawi.
Europe-a ram tam tak chu hri leng kai an pun chak leh tak hlawm em avangin tun lai hian an buai leh hle tawh a, inkhuahkhirhna an kalpui leh nasa hlawm.
Slovak Prime Minister Eduard Heger chuan Thawhtanni atangin invenna la lote bik kharkhip an ni dawn tih a puang a. Czech sorkar pawhin inkharkhipna tenau deuh a kalpui tan mek a. Netherlands pawhin kar hmasa kar tawp atangin inkharkhip nem deuh chi a kalpui bawk.
German hruaitute pawhin Covid-19 damdawi in indaih loh deuhna hmunah invenna la lote khuahkhirhna kalpui turin ruahmanna an siam tawh a. Hei hian state 16 an neih zinga 12 zet a huap ang.