EDITORIAL 20/11/21


Politics hi party inbeihna hmunah chauh kan chhuah ang e

Rorellai MNF party chuan Swadesh Darshan-II sum hmanga hnathawh Durtlang – Chaltlang Ropeway siam leh Sakawrhmuituai tlanga Skywalk siam hnathawh mumal lo chhui chiang turin Lokayukta-ah FIR thehluh an tum thu an sawi a, sorkar hmasate thiltih dik loh awm ni ngeia ngaiin theihtawpa chhui zui leh bawhzui an tum a ni.
State kan nih hnu pawhin sorkar hrang hrang kan lo hrawn tawh thin a, heng te hian sorkar na an chan chhung na na na chuan hna an thawk nasa hlawmin, dik lo deuha tih pawh an lo nei nual tawh thin bawk niin a lang. A hnu lama inbeihna leh chhui zui ngai awm fo thin erawh hi chu a pawi a, ram hmangaihna vang nge, mahni party vawrh kan tumna vang tih pawh hi hriatthiam a har tawh thin.
Tuna MNF lamin chhui zui ngai an rawn siam leh tak pawh hi sorkar hmasa tih dik loh nge pawh a hriat ta lo a, dan dik taka rorelna kalpui ngei a tul hle. Thubuai rem ngai awm leh thin hrim hrim hi a pawi a, ram rorelna tha lo zia dik tak a ni thin bawk. Eng party pawh lo sorkar se, dan dik taka hna an thawh a, fel taka ro an rel chuan ram nuam kan siam a nih mai laia chhui chian ngai awm leh thin zawnga kan lo kal tawh thin hi sim a tha khawp mai.
Lokayukta te pawh hi sorkar hotu lu ber thlenga chhui thei tura din a ni a, hnathawh tur hi pe tamin, hrem pawh hrem ngam zel se la, dan dik taka rorelna kan kalpui chho thei a nih phawt chuan kan ram chu a nuam lehzual ngei ang. Politics hi party inbeihna hmuna kan chhuah zel a nih erawh chuan thangtharte nunah tui lohna leh ngaihnepna a awm zel ang tih a hlauhawm a, hna tha zawk thawk zel thei turin sorkar na chelhtu apiang inbuatsaih chho zel mawlh teh se.

Leave a Reply

Your email address will not be published. Required fields are marked *

error: Content is protected !!