Sorkar laipuiin farm law pathum hnuk kir ta


Indian Prime Minister Narendra Modi chuan sawi hlawh tak, farm law an tih pathumte chu lo neituten kum khat chuang duh lohna leh hnuk kir tura nawrna an lantir hnuah hnuh kir a nih thu a puang ta.
Lo neitu sang tel chu dan duh loh entir nan hian nikum November thla a\ang khan Delhi ramri-ah awm khawmin khaw lum, khaw vawt leh Covid-19 len lai pawhin an awm sawn chuang lo.
Lo neitute chuan dan thar hmang hian nakin lawkah mi hausa thuhnuaiah lutin an sum lak luh a tlem phah vek dawn niin an sawi.
Tun hnai thla eng emaw zat chhunga lo neitute nena indawrna awm miah si lovin Zirtawpni khan rin lawk loh taka sorkar hian a hnuh kir thu a puang ta thut a ni.
Modi-a leh a minister-te chuan vawi tam dan thar hi lo neitute ham\hatna tur a nih thu leh hnuh kir chu an tum loh thu an lo sawi fo tawh \hin.
Lo neitu pawl hrang hrangte chuan hnena changah an inngai a; mahse, mi thiamte chuan lo neitu tamna, Punjab leh Uttar Pradesh-ah state inthlan a awm mai dawn avangin sorkar hian hei hi thlirin thutlukna a siam zawk a nih a rinawm thu an sawi.
Zirtawpni tuka prime minister-in thutlukna a puan hi Sikh-ho ni pawimawhah chiah a ni a. Sikh tamna, Punjab-ah chuan an sakhaw dintu, Guru Nanak-a piancham an lawm a ni.
Ram mipuite hnena TV-a tihchhuaha thu a sawiah Modi chuan farm law-te chu lo neitu tenaute chawikanna tur a nih thu a sawi a. “Mahse, vawi tam an \hatna tur a ni tih sawi chuan an beng a thleng zo lo va. Guru Purab-ah chiah sorkar chuan farm law pathumte a hnuh kir thu hi a puang a ni,” a ti.
Punjab leh Haryana-a lo neitute chu dan thar hlih hi an lawm hle a, hnehna puanzar zarin chithlum an sem a; mahse, an beihna chu a la tawp lo tih a sawi.
“Tawngkaa intiamna chu kan la duhtawk lo. Ziakin dan hi hlih a ni tih a awm hma chu hetah hian kan la awm reng ang,” tiin Delhi-Ghazipur border-a kum khat chuang dan duh lohna lantira lo awm tawh, lo neitu kum 99 mi, Raj Singh Chaudhary chuan BBC a hrilh.
Lo neitu pawl hruaitu langsar ber pakhat, Rakesh Tikait-a pawhin parliament thlasik session neihah dan anga dan thar hlihna pass a nih hma loh chuan an hmun ngaiah an la inkulh dawn tih a sawi bawk.
An hruaitu dang pakhat pawhin sorkarin intiamna dang a neih a ngai tih a sawi a, an duh lohna titawp tak tak tur chuan an thlai thar hralhna man chungchangah pawh chet lakna a neih a ngai niin a sawi.
Politics lama mi thiam te, dan thar thlawp leh thlawp lote zingah pawh, sorkarin a hnuk kir ta chu lo neitute tan hnehna a ni a, Modi-a tan tlak hniamna niin an sawi hlawm.
Lo neitu hruaitu thenkhat leh economist eng emaw zat, dan thar tha titute erawh chuan pawi an ti a. India khawthlang lama lo neitu hruaitu, Anil Ghanwat chuan politics lam thlir chunga sorkarin a hnuk kir ta chu vanduaithlak a tih thu a sawi.
Eptu party-te chuan sorkar thutlukna hi an lawm hle a. Congress party hruaitu, Rahul Gandhi chuan ‘rorelna dik lo tak laka hnehna’ a nih thu a sawi a. West Bengal Chief Minister Mamata Banerjee chuan lo neitute fakin a lawmpui thu social media-ah a tar lang bawk.
BJP member-te chuan dan hnuh kir hi inthlan thlira tih a nih loh thu an sawi a, duh lohna lantir tihtawpna tur mai a nih thu an sawi a. Nakin zelah dan thar hi tharthawh leh tum a ni dawn em tih an sawi lo bawk.

Leave a Reply

Your email address will not be published. Required fields are marked *

error: Content is protected !!