South African legend AB de Villiers a chawl

South African cricket captain thin AB de Villers chuan cricket a chawlhsan thu Zirtawpni khan a puang.
Kum 37 mi hi batsman ropui De Villiers hian kum 2018 khan ram tana cricket khelh a chawlhsan thu a lo puang tawh a. Mahse khawvel ram hrang hrangah Twenty20 franchise league-ah erawh a la inkhel thin.

Cricket inelna match a khelh hnuhnun ber chu October thla khan niin kum 10 a lo khelh tawhna Indian Premier League team Royal Challengers Bangalore tana ni.

“Zinkawng hlimawm leh ropui tak a ni. Ka u te nen kan naupanlaia kan in kianga kan khelh thin atang tawhin he infiamna hi hlim leh phurna namen lo nen ka luhchilh a. Tunah kum 37 mi ka ni a, ka hun a inher liam ve tawh a ni.” tiin a chawlh thu social media-ah a puang.

De Villiers hi a vanglai a South African batsman ropui berte zing ami a ni a. Ram tan Test match vawi 114 a khel a. One Day international vawi 228 khelin Twenty20-ah vawi 78 an ram tan a khel.

Test leh ODI cricket-ah South Africa tan batting average-ah 50 chuang a pel ve ve a. Test cricket ah century vawi 22 siamin ODI-ah vawi 25 a siam thung.

Twenty20 bikah hian ram leh league hrang hrangah match 340 a khel tling a. Run 9,424 siamin khawvela batsman hlauhawm ber zing ami a nihna chhan chiang takin a hmuh theih.

Century vawi li leh half-century vawi 69 a siam in a hlauhawmzia a hrilh a. Strike rate 150.13 leh batting average 37.24 a nei.

“Cricket hi ka hringnun atan hian thil tha a ni a, Titans emaw, Proteas emaw, RCB a ni emaw, khawiah pawh inkhel ila, he infiamna hian hlimna leh huntha tam tak ka tan a hawng a. Hei vang hian he infiamna leh a chhung amite chungah hian ka lawm tak zet a ni.” tiin a sawi bawk.

Kumin IPL-ah De Villiers hian run 313 siamin a team in Playoffs an khelh theih chhan pawimawh a ni a. Men’s T20 World Cup hma khan Cricket South Africa chuan ram tana khel leh turin inbiakna an neihpui hman.

Amah thlahtute an hraw hlawm hle a. India captain lRCB tana a khelhpui Virat Kohli chuan, “Kan hunlaia player tha ber leh ka mi hriat tawhte zinga ka ngaihsan i ni. I hnuhma leh hlawhtlinna zawng zawngte hi a chhuanawm a, kan hnena i hnutchhiahte hi a ropui lutuk.” tiin a thlah.

Leave a Reply

Your email address will not be published. Required fields are marked *

error: Content is protected !!