TaFMA working chairman, Adviser to Nagaland CM ni bawk Abu Metha leh TaFMA Adviser Theja Meru ten kumina Hornbill festival-ah MYC-in zaia inelna a buatsaih MYC Perhkhuanga a ti tha mi 5 te leh Mizo thalaite tan minute 40 hun an pek tur thu leh kumthar lamah TaFMA-in India ram pawna platform an neih thenkhat chu MYC an kian thei tih MYC chairman Dr Vanlaltanpuia leh a thawhpuite an hrilh.
MYC chairman Dr Vanlaltanpuia hi MYC partner North East Wave (NEW) project director HS Lalruatliana (Boom-a) leh MYC-a thawktu dang te nen Nagaland sorkara Task force for music & arts (TaFMA)-in Nagaland governor leh chief minister te puala tun thla ni 17-a musical event a buatsaihah tel tura sawm an nih angin an tel a. MYC chairnman leh Mizorama he huna tel dang te chu Nagaland chief minister Neiphiu Rio-a’n lo lawmin, TaFMA leh MYC an thawkho thei chu lawmawm a tih thu leh MYC tana an inhawn thu a lo hrilh bawk.
Dr Vanlaltanpuia chuan Nagaland sorkarin thalaite chawikanna tura kawng hrang hranga hma an lakna te fakin, a bikin music lama TaFMA-in hma a laknate fakawm a tih thu a sawi a. Mizo thalaite tana Nagaland TaFMA-in kawng a sialpuina kawngah lawmthu sawiin, nasa zawka thawhho tul a tih thu a sawi.
TaFMA hi Nagaland sorkar hnuaia awm niin, thalaite kawng tinrenga huikhawmtu, festival lar tak Hornbill festival pawh buatsaihtu a ni.