Premier League champion lai Manchester City in hmahruaitu Chelsea an umna an chhunzawm a. Pathianni zanah Everton lakah harsatna nei lovin hnehna an chang.
Etihad Stadium-ah City tan first half-ah Raheem Sterling chuan goal hmahruai a khung a. Premier League a vawi 300 a inkhelhnaah Joao Cancelo ball pass ‘cial’ tak mai chu goal-ah a chantir.
Second half-ah Rodri chuan kawh tak maiin an goal hnihna a hlap lut a, inkhel tawp hnai tawhah Bernardo Silva chuan an goal thumna a khung leh bawk.
Everton hi team bet zawkah an tang tluan a. First half-ah Michael Keane’an Raheem Sterling a tih tluk avanga penalty a chawi tur ni awm tak chu video assistant referee thutlukna avangin hnuhkir a ni a. Rafael Benitez-a pawlte hian an player pawimawh pali an chhawr theih loh chu khelmualah an hliahkhuh zo lova. Demarai Gray inhliam an la neih belh bawk.
Ilkay Gundogan-a’n crossbar a tauh per bakah Everton goalkeeper Jordan Pickford -a’n an mualpho tur hliahkhuh nan Silva leh Sterling te lakah save tha a siam bawk a ni.
Manchester City boss Pep Guardiola chuan, “Goal an veng uluk a, an inrem thuk avangin kan ball inpek kualna turah hun kan ngah phah a. Mumal taka ball inpek kual kan theih phah. Inkhel kan thunun theih phah a, anni counter-attack tur kan veng bawk. Everton ang khel team te hneh theihna tura inkhelh ngai ang takin kan khel a ni.” tiin an chak hnuah a sawi.
Conte-a’n league-ah Spurs a chakpui nghal
Antonio Conte-a’n Leeds United hneh turin second half-ah ‘comeback’ an mamawh a. Tottenham in 2-1 in Leeds United an lehthal.
A tir minute 45 chhungin Tottenham Hotspur Stadium-ah mualneitu lamin goal-ah ‘shot’ an nei miah lova. Awmze nei a goal nawr an nei tam lo.
Lehlamah Kalvin Phillips-a’n goal a khung teuh hnuah Daniel James chuan Leeds goal a khung thung a. Second half-ah erawh Spurs danglam hle in goal ban vawi hnih an tihper hnuah Pierre-Emile Hojbjerg leh Sergio Reguilon ten goal an khung.
Inkhel zawhah Conte chuan, “Kar thum chauh heng player-te hi ka la thawhpui a, ram tana inkhelte phei chu kar khat bak ka la hmelhriat lo. Chuvangin hmasawnna tur hi chu tam tak a awm tih hi tuman an hai lo.” tiin a sawi.