LBS Lifestyle chuan tawn hriat an neih tawh atangin Mizoramah furniture changkang lei tur a that tawk lo avanga harsatna tawk thin an awm a, hei vang hian niminah Dawrkawn, Chaltlang, Aizawlah Durian showroom an hawng.
LBS Group chhungkaw nu ber, T Zosangpuii chuan mipui mamawh phuhru tur leh malsawmna a nih theih nan a hawng a, ‘chapona atangin hlawhtlinna a awm ngai lo,’ tih sawiin, thawktute chu tlawm taka anmahni dawrtute dawngsawng turin a chah.
Mumbai-a inbun Durian hi India rama furniture siamtu hrang hrang zinga number one ni fo thin a ni a. Aizawla shoowroom hawn a nih rualin chenna in leh office-a hman chi furniture chikim chhawpchhuah nghal a ni a, an lak khawm sa hmun thuma thena hmun khat chu hralh chhuah mai theih turin an hauh lawk a ni.
LBS Group Chief Executive Officer H Ngurdingliana Ngurte chuan 2017 atangin LBS Lifestyle an hawng a, kum li chhung Evok furniture hmanga sumdawnna an kalpui tawh chhungin Mizoramah furniture changkang leh man to lei tur a awm that loh avangin mi thenkhat an buai tih a sawi.
Ngurdinga chuan, “Mizo mipui mamawh kan pek theih dan tur kan ngaihtuah a, India rama furniture siamtute zinga an dah san ber pawl leh Mizote mil tur bera kan ngaih Durian kan dawr a, a tira a harsain vawi 10 chuang meeting kan neih hnuah kan inrem thei ta a ni,” a ti.
Mizorama Durian showroom hawn thar a nih lawm nan leh krismas pualin December 1-20 chhungin an bungraw zawrhte 60% thlengin a man tihtlawm a ni dawn a, an zawrh zingah dawhkan Rs 25,000 atanga Rs 4,00,000, sofa Rs 25,000 atanga Rs 8,50,000 man a tel a ni.
Durian showroom tharah hian thawktu mi 13 an awm a, hetih rual hian Mizo thalai mi 135-in October 2003-a din LBS Group hnuaiah ei zawngin hna an thawk mek a ni.