EDITORIAL 24/11/21


Zirlai pawlte an vung chho zel thei dawn em?

NABARD sum hmanga school building sak hnathawh mekah dik lo taka thiltih leh namnul a awm nual niin tunhnaiah social media hrang hrangah a rawn lar thar hle a, a khawihtu leh hna neitute lah minister lamhnai tak tak an nia sawi a ni bawk.
Zirna kaihhnawih a nih miau avangin zirlai pawl lian MZP in thawm an rawn nei nghal a, an president kaihhruaina hnuaia committee din nghalin, an headquarters, sub-headquarters leh branch zawng zawngte chu an huamchhunga hmalakna awm apiangin report pe turin an hriattir nghal rup bawk a, eng tak thleng zel ang i maw?
Kan hriat angin education minister hi zirlai pawl hruaitu hlui a ni a, hnathawktu zinga mi pakhat lah zirlai pawla hruaitu lo ni tawh thin tho a ni bawk. Dan dik lova hnathawh lo do nasa tawh leh duh lo ber thintu leh zirlai pawl kaihruai mektute an inchhui chho dawn a ni a, a zuzi mai ang tih erawh hlauhawm tak a ni.
Pawisa inpek dan leh kal dan zawng zawng chu thukhatah lo dah ta ila, zirlai pawlte hian school building sak chungchangah dik lo taka thil kalpui a awm em tih an en nat zual bik a rinawm a, hruaitu thar inthlang hlim an ni bawk a, an hmalakna thawm hriat zui a chakawm tawh hle.
MZP hian an establishment neihna hmuna hnathawh dan report te chu kar khat chhung pe turin an inhriattir a, information an inpe khauh viau bawk nia hriat a ni. He NABARD sum hmanga hnathawhah hian dik lo taka thiltih a lo awm ngei a nih chuan huaisen takin hma la ngei se la, chutiang tur chuan inbuatsaih sauh sauh bawk teh se. An kal vung chho zel thei dawn em, i lo thlir ang u.

Leave a Reply

Your email address will not be published. Required fields are marked *

error: Content is protected !!