AIZAWL: Khanpui Village Council kaihhruaia tlawmngai pawl hrang hrang hruaitute thukhawm chuan Chalfilh tlanga tourism department-in construction an lo neihte thiah kher tul an ti lo.
Thawhtanni zan khan Khanpui khaw chhunga tlawmngai pawl hrang hrang hruaitute chu an thukhawm a, National Green Tribunal, Eastern Bench-in Chalfilh tlanga tourism department-in construction an lo tih tawh zawng zawngte thla khat chhunga tichhe vek tur leh thian fai vek tura Mizoram sorkar thu a pek chu a ram neitu, Khanpui khawtlang chuan an hrethiam lo hle tih an sawi.
“He building sakna hmun hi phul hmun vek a ni a, thing leh mau tihchhiat a awm lo,” an ti a, he building thiah hian tui hna a tihpun belh a, ngaw a siam belh dawn loh avangin Khanpui khawtlang chuan thiah kher a tulna an hre lo tih thuchhuah siamin an tar lang.
Khanpui VC ram huam chhungah hian khaw pakuain tui an la mek a, heng khaw hrang hrang tui lakna hnarte hi khawtlangin reserved area siamsakin tha taka humhalh a ni tih an thuchhuahah chuan an sawi.
Chalfilh tlang hi Khanpui khawtlang chuan reserved area-te siamin hun rei tak ata an lo enkawl tawh tih tar langin department, society, NGO leh a dangten project chi hrang hrang hmangin sum siam nan an hmang thin a, hei hi ramngaw tichhiaa tichereutu ber pakhat a ni tih an sawi.
Tun hnuah Chalfilh tlang hi department, society leh NGO leh a dangten sum siam nana hmanga hma la tawh lo law law turin Khanpui khawtlang chuan an duh zawk tih an tar lang bawk.