Larsap Hari Babu Kambhampati-a’n nimin khan Raj Bhavan-ah Mizoram PWD leh Revenue hotulu te kawmin, Kaladan multi-modal transit transport project (KMMTTP) chungchang a sawipui.
Larsap chuan Mizoramin pawimawh tak pahnih KMMTTP leh Rel kawng siam hna a neih mek te chu Mizoram leh hmarchhak tan mai ni lo India tana project pawimawh thu leh zawh thuai a pawimawh thu a sawi a. Central dawr a ngai a nih pawhin theihtawp a chhuah dawn tih a sawi.
KMMTTP project peihfel a nih theih nan Mizoram chhunga MPWD te hnathawh zawh mai a tawk lo tih Larsap chuan sawiin, Myanmar chhunga ministry of external affairs-in hna a thawh te pawh peihfel tho a tul avangin MEA-ah pawh ngenna a siam tur thu a sawi a. He project siam zawh a nih hunah Mizoram leh Kolkata inkar chu tuna kawng hman mek aiin a chanve laiin a tawi dawn tih sawiin, chu chuan bungraw phurh man a tih tlawm bakah Mizoram chu sumdawnna kawtchhuahah a siam dawn tih a sawi bawk.
MPWD engineer te report sorkar thuchhuahin a tarlan danin, KMMTTP-ah hian sector 5 awmin, Lawngtlai – Zorinpui (87.51 Km), Zorinpui – Kaletwa (45 Km), Kaletwa – Paletwa (60.70 Km), Paletwa Lawngchawlhna – Sittwe Lawngchawlhna (150 Km) leh Sittwe Lawngchawlhna – Kolkata Lawngchawlhna (539 Km) te a ni a. KMMTTP route hian Kolkata leh Mizoram inkar kawngpui awm mek Km 1764 chu Km 882.21 ah a titawi dawn a ni.
MPWD-in Lawngtlai – Zorinpui (87.51 Km) siam hna chu kum 2013 atangin an thawk tan a. Project hnathawhna sum a tirah Rs vbc 579.65 ruahman niin, ennawn a nih hnuah Rs vbc 1028.15 ah a chho a. Tunah hian Km 87.51 a thui siam turah Km 84.19 siam zawh ni tawhin, lei dawh hna hmun 8-ah thawh mek a ni tih sorkar thuchhuah chuan a tarlang.
MPWD te chhut dan chuan he project hnathawh mekah hian hna za-a 96.21 zawh a nih tawh a, project hnathawhna sum za-a 95.68 hmuh tawh a ni tih sorkar thuchhuah chuan a tarlang a. Project ennawn hnua sum hmuh tur engemawzat hmuh a la ni lova, ram lak tur chungchangah court case kallai a awm mek a, hei vang hian contractor te an khawmuang deuh nia sawi a nih thu sorkar thuchhuah chuan a tarlang bawk.
MPWD chuan harsatna tenau chu chinfel thuai a nih an beisei thu leh kum khat chhungin he project MPWD khawih chin chu zawhfel an beisei thu an sawi a. Aizawl leh Tripura inkalpawhna tur kawngpui NH 44 A an siam meka harsatna an tawh chungchang pawh Larsap chu hrilhin, hmalakpui turin an sawm bawk a ni.