Auto Corner
by Ruata
Renault Kwid Nuai 4 hralh pel ta
Kum 2015-a tlangzarh Renault Kwid chu ramchhungah nuai 4 lai mai an hralhchhuak ve ta a. Lirthei te (small car) huanga mi niin a man nena inphu tak, a elpui te nena khaikhin pawha chak tha tak Renault Kwid hi 6 bawr vel hnuah pawh hralh a la tla chhunzawm zel a ni.
France company lirthei hlun leh lar em em Renault company siam Kwid hi CMF-A platform nghahchhana duan hmasak ber a ni a, India ram ngeia India tan bik liau liaua design a ni a. Tunhnaia Maruti Suzuki S-Presso lo chhuak te nen hian inel tawk vela ngaih a ni a. Anmahni huangah chuan lirthei tha leh hralh kal tak ve ve an ni awm e.
Renault Kwid history tawi
Renault Kwid hi kum 2015 September thlaah khan man man em em mai, Rs. Nuai 2.57 (ex-showroom, Delhi) man atanga intanin tlangzarh a ni a. A tirah khan 800cc
khawl hman tir a ni a. A hnu kum khatah 1.0 litre khawl (1000cc) duhthlan tur an rawn dah belh.
Tuna an facelift model mai tak mai hi kum 2019 khan tihchhuah a ni a. Hetah hian a tira chhuak aiin danglamna a awm neuh neuh a. A pawn, a chhung leh a kentel hrang hrangah a rawn mawi zualin a rawn tha zual zel a ni. Renault Kwid hi a tirah India ram tan liau liaua design tih takah company lam chuan thawnchhuah an la nei chiah lo a, tunah a model thar ber, facelift model ho hi thawnchhuak turin ruahmanna an siam ve mek a ni.
Kumin September thla tir lam khan Renault chuan India rama an lo luh kum 10 na an lawm a. Hemi rual hian Kwid chu rawng chi hrang dang dahbelhin leh himna hmanraw tha zawk te nena thawmbelhin Renault chuan an tichhuak leh bawk a ni.
Renault Kwid hi India rama lirthei media lian Auto Car India chuan kum 2017 khan India ram atanga Renault headquarters awmna leh a lo chhuahna ram France khawpui Paris thleng an khalh thleng nghe nghe a ni.
A khawl leh a kentel hrang hrang
Tarlan tawh angin Renault Kwid-ah hian petrol khawl pahnih duhthlan tur a awm a. Pakhat hi a hmaa kan sawi tawh 800cc petrol khawl kha niin he khawl hian 54hp power a pechhuak thei a. Pakhat zawk chu kan tarlan tawh tho
68hp power pechhuak thei 1.0-litre petrol khawl a ni veleh thung a ni. Transmission lamah chuan heng khawl pahnihte hi 5-speed manual gearbox ve ve in a awm a, a khawl lian zawk 1.0-litre unit-a hian AMT geabox duhthlan tur a awm tel bawk a ni.
Renault Kwid hi chi 5 – RXE, RXL, RXT, RXT(O) leh Climber (O) te a awm a. Kwid man to ho hian hmanraw hrang hrang – LED DRLs, 8.0-inch touchscreen – Apple CarPlay leh Android Auto kengtel bakah 14-inch wheels, roof rail, manual AC, rear centre armrest, dual airbags, ABS with EBD, rear parking sensors leh thildang hrang hrang a kengtel a ni.
A man leh a elpuite ho
Tunah hian Renault Kwid hi Rs Nuai 4.11 – 5.56 (ex-showroom, Delhi) man inkarah a awm a. A elpui lirthei ni bera lang te chu Maruti Suzuki S-Presso, leh tuna tlangzarh thar Maruti Suzuki Celerio-a a man tlawm hret ho ang hi a ni dawn a ni.
Maruti Suzuki 800 lirthei chhuak ta lo khan 800 niin 37bhp power vel a pechhuak thei a. Hyundai Eon kha 814cc vel niin 55bhp bawr vel power a pechhuak thei bawk. Maruti Suzuki Alto 800 hian 40bhp bawr vel a pechhuak thei bawk a. Kwid hian sawi tawh angin 800cc bikah hian 54bhp bawr vel a pechhuak thei a, 800cc rau rauah lirthei chak pawl tak a tih theih awm e.
Hetiang chiah hian a khawl lian zawk 1.0 litre ah pawh power pe chhuak tha pawl tak a ni a. A khawl ngawr ngawr kan han khaikhin a ni a, a elpuite zingah pawh hian ken tel hrang hrang ngah pawl tak leh changkang pawl tak a tih theih awm e.
Hetihrual hian lirthei dangte ang bawkin Renault Kwid duhthu a sam lohna hi chu sawi tur a awm ve tho a, eng lirthei mah hi tha famkim leh duh zawng zawng kimna a awm lemlo a. India rama a hlawhtlin chhohna tarlan pahin Renault lirthei tha tak Kwid hi kan han belchiang thar leh a ni.